Se o Mâ Mediterraneo o l’è tròppo piccin pe-a Fransa e a Turchia
Ancon abbessia e convalescente dòppo meixi de confinamento, o 4 de agosto l’Euröpa mediterranea a vëgne sciätâ da unna tremenda esploxon: 2.700 tonnei de nitrou d’ammònio (mâ) conservæ into pòrto de Beirut scceuppan, con scancellâ di casamenti intreghi, machine, stradde, vitte (quæxi 200 mòrti e ciù de 6.500 ferii). I danni son stimmæ in ciù de 10mld de dòllai.
Preceduo da aggiutti e soccorritoî da proteçion civile, o prescidente franseise o l’é o primmo a rendise in sciô pòsto, o 6 de agosto: natua inquieta, ambiçioso, o Macron o se propoñe comme federatô di aggiutti pe-o Libano, sponciando a-o tempo stesso i responsabili locali à “procede a-e reforme, à cangiâ scistema, à ciantâla co-e divixoin interne e à lottâ contra a corruçion”. Aggiutti belli politichi, donca. Unna petiçion online (“Mettei o Libano sotta protettorou franseise pe-i 10 anni chi vëgne”) a riçeive inte 4 giorni ciù de 70mia firme. Inte quell’occaxon o Macron o diciara “se no ô fa a Fransa, i turchi, i saudii ò i iranien s’invitian inti affari interno do Paise, e chi ghe scrosce o l’é o pòpolo libaneise”.
Doî giorni apreuvo, l’8 de agosto, o l’é o turno do viçe-prescidente turco Oktay e do ministro di esteri de Erdogan, che in ciù di aggiutti sanitäi mettan à dispoxiçion 400 tonnei de gran, o pòrto turco de Mersin (pe dirottâ e gestî o trafego destinou à Beirut) e e impreise naçionæ pe-a riconstruçion. Oktay o l’attribuisce a-o Macron unna “politica estera coloniâ” e ô tratta da “zoenòtto viçiou con de manie de protagonismo”.
Ma se ammiemmo ciù da vexin cöse succede into Mediterraneo orientale, se rendemmo conto che l’é di meixi che a tenscion tra Fransa e Turchia a monta, in sce doî fronti a-o manco, inti quæ l’Italia ascì a l’é in zeugo: a Libia e a prospeçion petrolifera intorno à Cipro. A Turchia a l’à açeiso a miccia do novembre 2019 firmando co-o debole governo de Al Sarraj un accòrdio condannou da tutti i vexin (Fransa, Italia, Greçia e Egitto): l’accòrdio o l’autorizza à mandâ de truppe turche à Tripoli e o crea un corrieu marittimo tra Libia e Turchia che o faieiva cresce de un 30% a piattaforma continentâ de st’urtima into Mediterraneo orientale. Dapeu à zugno un incidente in mâ into contestou “corrieu” o l’açende torna i spiriti: unna fregâ franseise de battuggia inta zöna pe conto da NATO a preuva à intercettâ un cargo à bandea tanzaniaña. Sciben che sospettou de violâ l’embargo internaçionâ, o cargo o l’é scortou da diverse unitæ da mariña turca: a fregâ franseise a l’é obbligâ à virâ sotta a minaccia do feugo turco. Unn’inchiesta a l’é in corso. o 20 de luggio intra in zeugo l’Egitto ascì, che o l’autorizza à mandâ de truppe in Libia pe oppoñise a-i turchi e à Al Sarraj.
A rispòsta turca a l’é inmediâ: 18 nave da guæra partan a-a vòtta de Cipro pe scortâ unna nave de riçerca scismica incarregâ de effettuâ çerti foraggi petroliferi. Se temme anche l’annescion turca de çerte isoe greghe (Kastellorizo) into contestou corrieu. O 20 de agosto, infin, corpo de scena : o Erdogan o l’annonçia a-a stampa “amiga”a scoverta de un giacimento stramesuou de gazzo, into Mâ Neigro: 320mld de metri cubbi che – segondo lê – se porrieivan sfrutâ za do 2023. Stavòtta inta piattaforma continentâ turca. A stampa franseise a ridimenscioña ben ben a “miracolosa” scoverta, a quæ a permette do resto de fâ chinâ a tenscion into Mediterraneo. Pe quanto tempo ancon? Purtròppo l’é di secoli che a Repubrica de Zena a l’à perso influensa into streito do Bòsfoo...