Quelli che tornan à vive in scî monti

Into 2015 Luca Papalia, lezzendo o potençiâ de bellessa e de qualitæ da vitta ascoso inti borghi de l’entrotæra ligure, e o straggio diffuso inte l’abandon de st’infinitæ de paixi, o decidde de ciammâ i amixi Matteo Filipone e Elisa Rateni pe promeuve a renascion do borgo semi-abandonou de glori, inta valle argentiña. Con un progetto bello semplice: anâ à stâghe, e invitâ atre persoñe à fâlo. L’é passou çinque anni e Filippone (Ass. “Glori, the place to be”) o ne racconta a stöia de sto villaggio e a seu neuva vitta.

Ancheu Glori o l’é renasciuo, ma perché scin à quarche anno fa o l’ea reduto a un paise fantasma?

“Savemmo che za primma di anni ‘70 se registrava unna perdia de abitanti, ma l’esödo da popolaçion o comensa in davei à partî da-o 1972, stæto finio de construî a stradda ch’a collega o paisin a-a provinçiâ. Quella stradda, che a poeiva garantî unna vitta megiô a-i abitanti do paise, avvexinandoli à di serviçi che ean stæti delongo fadigoxi, pe paradòsso a ne decretta l’abandon. À l’epoca l’aspettativa de chi ghe stava o l’ea un travaggio stabile in rivea, ch’o garantisse de megio prospettive pe-i figgi, abituæ à unn’oa e meza de cammin pe arrivâ à scheua. In sciâ rivea do boom econòmico ligou a-o turismo s’accattava casa con pöco e inti alberghi se trovava da travaggiâ à de condiçioin che in montagna un o se l’ascòrda.

L’abandon o pòrta e case à anâ à mäpezo, i bòschi à “bruttâse”, i terren in montechiña à indebolîse, finindo pe redue i campi à zerbo. Inti anni ‘80-‘90 arriva quella che da niatri a se ciamma a fase do “neocolonialismo”: tòcchi de borgo vëgnan accattæ pe quattro lie da di foresti, e case son restrutturæ ma arrestan serræ pe 11 meixi à l’anno. O fenòmeno o no l’à interessou solo Glori, se capisce, ma pin de atri borghi in Italia e in Euröpa. I vegi abitanti dixan che “i tedeschi no n’an conquistou co-e arme, ma co-e palanche vint’anni apreuvo”. Do 2015 Glori o l’é un paise “chicca”, restaurou a-o 70% e pe-o resto solo roiñe; ghe stava unna trenteña de persoñe over 65. e in giornâ a l’é ancon coscì, perché o seu repopolamento o l’é solo à l’iniçio”.

Do 2015 arrivæ à abitâ o borgo pe fâlo renasce. Ancheu quanti sei, comme vivei à Glori, e scheue e a sanitæ ghe l’ei?

“I primmi anni eimo solo in 4, ciù i 35 vegi rexidenti. Graçie à l’attivitæ de promoçion do ‘caxo Glori’, à traverso i soçial e à l’aggiutto de atre realtæ comme Legambiente, ancheu semmo 14 neuvi rexidenti, tra i quæ trei figgeu e atre famigge zoene che abitan chì tutto l’anno. Doî zoeni, trovæ graçie à un appello, gestiscian o bar-ostaia, doe famigge an averto doe aziende agricole, mi e mæ moggê semmo artexen, atri travaggian in Valle. Tanti de niatri son laureæ.

E poscibilitæ de travaggio son infinie: tutto sta inte capaçitæ imprenditoiali de ognidun de niatri, e no se tratta solo di mestê artexanali ò ligæ a-a tradiçion rurale, perché avendo portou internet se peu svòlze de attivitæ de riçerca ascì, ò de consulensa da remöto. Unna zoena a l’é apreuvo à seguî l’universcitæ on-line e niatri tegnimmo de video-conferense connesci co-o resto do mondo. I nòstri figgi van à scheua à Moin de Trieua, che battaggiando semmo riescii à fâ tegnî averta, ma st’anno chì fòscia no gh’â faiemo. Penso che l’abandon di borghi o segge caxonou ascì da-a pöca capaçitæ da politica de traguardâ di orizzonti lonten. Pe fortuña à Moin de Trieua e scheue fonçioñan e l’amministraçion a l’à investio pròpio in sce l’accescibilitæ a-o studio, fornindo un serviçio de scheuabus ch’o l’accompagna anche i figgeu a-e medie de Badalucco. Se un o decidde de anâ in montagna l’é pe stâ megio, ma se pöi accede a-i serviçi de base o deve ëse un peson, un incubo, l’é ciæo che o progetto de vitta o no l’é ciù sostegnibile. Beseugna dî che Glori, rispeto à atri borghi monten, o l’é fortunou pe-a poxiçion, ësendo à 5km da Badalucco donde gh’é tutto, fiña a sanitæ de base, e à 30 menuti da Sanremmo”.

Viatri sei un caxo ben ben in linia co-o modello do quæ se discute à livello italian e europeo, che o vedde o repopolamento di borghi, e ascì un modello de çittæ no ciù macro, ma compòsta da arcipelaghi de “çittæ da 15 menuti”, comme unna via da percorrî pe garantî à tutti un futuo equo, san e ch’o l’avvarde o nòstro planeta. Quæ o l’é o vòstro tallon d’Achille?

“O l’é o tempo che poemmo dedicâ a-i bandi europëi, teixi à incentivâ a rigeneraçion di territöi pe mezo de di progetti green e boin à attivâ de economie circolari. Emmo de idee, ma emmo beseugno de interlocutoî che ê raccheuggian e ê traduan inte di progetti da portâ in Euröpa pe ëse sostegnui e reproduti da atre realtæ; i bandi europëi son assæ complesci e l’é neçessäio avei di sportelli con do personale formou che o se dediche a-a progettaçion europea. Niatri emmo boña voentæ: quande no aveivimo i serviçi, comme internet, se î semmo construii da soli, ò rivendicandoli da-o basso, ma i progetti comme Glori meitieivan de ëse portæ avanti in mòddo scistematico no solo da-i scingoli çittadin battaggê. O futuo o l’é green, a l’é a sola stradda poscibile, ma beseugna percorrîla con metodo e tutti insemme. I borghi son un patrimònio e unna poscibilitæ”.