“CULMV”

“Scrittori naïfs”. Sta chì a l’é a collaña inta quæ o figua o libbro “Compagnia Unica Merci Varie” (Il Formichiere), de Mario Tortora, sciortio do 1974. In covertiña un disegno do mæximo scritô, da-a prospettiva inçerta, ch’o raffigua unna caladda con di camalli apreuvo à descarregâ un cargo.

Naïf. In realtæ un o no saviæ comme definî megio sta picciña, ma sorprendente recuggeita de stöie de vitta – l’é o caxo de dîlo – visciua, regòrdi de infançia, propòxiti onirichi tra o serio e o faceto. A vitta do Pòrto, a mæxima Compagnia, da quæ o Tortora – segondo quello che se imprende da-a quarta de covertiña – o l’é stæto sòccio pe diversci anni, arrestan in sciô sfondo. Za, perché into seu libbretto l’autô, co-a seu lengua fæta de slang de l’epoca e zeneise italianizzou, dòppo quarche pagina dedicâ a-a memöia de l’infançia e da guæra, sospeise tra o seugno e a realtæ, o no se limita à contâ da gloriosa CULMV e de avventue portuali comme un o s’aspëtieiva, ma o dipinze un vertadeo afresco da vitta de parte da çittæ (e no solo), di seu costummi ciù popolari, inricchio da intime conscideraçioin, ironia e da un sarcasmo mai tanto viaxo da pai quæxi ingenuo. I racconti da guæra, tra battue de caccia a-o gatto e fughe da-i tedeschi, e quelli de l’infançia regordando e cuggiaræ stramesuæ che o poæ o piggiava da-o menestron dòppo o travaggio, son solo che à l’apparensa feua da-o contesto. In realtæ introduan o mæximo personaggio de Mario Tortora, a seu “genexi” de òmmo avanti de tutto coioso e empatico, o seu sense of humor e, à mòddo seu, a sò profonditæ.

Inte un di primmi capitoli do libbro, o Tortora o conta de un viægio clandestin pe l’America – inte quelli anni in tanti s’assunnavan do continente american, imbarlugæ da-i spaghetti western – finio rovinosamente da desbarcou à Barçeloña, e affrontou in compagnia de un figgeu che “per me era più di un amico” e ch’o l’ea “un po’ scartato dagli altri perchè era un po’ troppo fantastico e illusionista. Si inventava un sacco di cose e le diceva così sicuro che mi sentivo trascinato a fantasticare anch’io”. Inte sto breve passaggio gh’é o træto primmäio di racconti che vëgnan apreuvo.

E picciñe e audaçiose avventue an comme leitmotif l’amô pe l’ironia, pe l’assurdo, o gusto da reaçion umaña inaspëtâ. Coscì un se treuva à fâ un fattoriso depoî a-a stöia de “Gionni l’Americano”, un portuale da-e pöse yankee, co-o quæ l’autô o fa amiciçia con imitâne i mòddi e i gesti di attoî d’oltreoceano. ò à rie à scciattapansa pe-a stöia strafaläia de quello meschinetto de un venditô ambulante de ençiclopedie, invitou à intrâ in casa da l’autô e ch’o finisce, sensa accòrzisene, pe passâ e maneghe de l’elegante giacchê in sciâ töa brutta de marmellata de möe sudafricañe, spantegâ giusto avanti da-o Tortora. O quæ, con de pagine deliçiose, o descrive tutto o seu sadico divertimento.

e coscì o score o libbro, tra incontri con balordi e legere de ògni smersa, personaggi da dòppoguæra allembeii da-a famme, imbriæghi da ostaia, “trafeghin” e scroccoin pronti à vendise chesesegge cösa ciutòsto che tiâ sciù un tòcco de pan (e un gòtto de vin), e dispòsti à tutto ciufito che à travaggiâ. Tutti avvexinæ da-o Tortora pe-o puo gusto de passâ con liatri quarche menuto, pe indagâ a seu natua in scê primme, comme dî, scingolare, inta speransa che da l’incontro o nasce quarcösa de divertente, unn’avventua da vive ò solo che unn’esperiensa da regordâ.

O mæximo Tortora o l’é, fòscia sensa voeilo, un personaggio de sto tiatro de stradda, co-e seu manie, e seu stranesse, a seu famme atavica figgia da misëia bellica, e l’arte da arrangiâse inte ògni scituaçion. Un personaggio reiso ancon ciù accapparrante e misteioso da-a breve e stranfaläia biografia, e da-i improbabili ritræti fotografichi contegnui into libbro, perso into seu tempo e inte l’umanitæ viaxa de unn’epoca da quæ i reciòcchi s’ammerman de maniman.