Stöia versus memöia

Stöia e memöia: un caxo eclatante de fäsci scinònimi. A Stöia a l’é sciensa, a l’é analixi, a l’é scintexi equilibrâ. A Memöia a l’é politica, a l’é seleçion, a l’é manipolaçion.

A Stöia a no ghe scrosce, a no risente da perdia di monumenti, ma a Memöia scì, tant’é che a-i monumenti se ghe dixe ascì memoriali. No existe unna Memöia spontanea, coscì comme nisciun monumento o l’é immun da-o passâ do tempo ò da-i rivolzimenti soçiali da-i quæ derivan e rielaboraçioin da memöia. Con lasciâ perde di caxi particolarmente traumatichi comme l’abaçia de Cluny ò i Buddha giganti de Bamiyan, sciña o Colosseo, sfruttou pe di secoli comme cava, o l’ea rischio de scentâ avanti de ëse sarvou da-o seu destin do 1750, con atto de imperio de Papa Benedetto xIV, che ô consacra à tutti i Martiri in occaxon do Giubileo. Vegnindo à Zena, gh’é un caxo de memöia assæ problematica da rielaborâ: a l’é quella etæ industriale da quæ e trasse, da trent’anni in sà, vëgnan scistematicamente scancellæ, con tutto che gh’ea stæto a premissa incoraggiante do recupero do Pòrto Antigo. De fæti a l’é brillâ a Bocciardo, a l’é stæta abbattua e riconstruia in fäso a Fiumara, l’é stæto ascciannou i capannoin de Campi e de l’Italcementi pe fâghe di atri capannoin, ma ciù squallidi, son stæti scancellæ l’oivâ Gaslin de Rieu e i silos romagnoli de Ponte Parodi, pe lasciâ di veui desolanti.

Sconzuou, a-o manco, l’abbattimento di silos hennebique e da ex-çentrale ENEL da Lanterna, con tutto che o gotha de l’imprenditoria locale a l’agge espresso contrarietæ – cösa questa che a dixe ben ben da longimiransa de élite zeneixi – l’urtima tragicòmica polemica a l’à coinvòlto o vegio gasòmetro MAN de Campi: in realtæ se trattieiva de un problema za risòlto da-o Stefano Boeri, co-o progetto vinçitô do concorso pe-o Parco do Ponte, ma dapeu a costion a l’é stæta averta torna e cavarcâ da çerta miserabile politica locale, a-a riçerca perenne de di bersaggi gròsci e façili. À dîla sccetta e netta, bastieiva sciortî da-i confin de Zena e da Liguria pe apprexâ, da di dexenni ormai, diversci exempi de reimpiego de di edifiçi industriali dismissi, gasòmetri incluxi, segge in Italia segge into resto d’Euröpa. Inte sta “ex çittæ” de nomme Zena, che ciù a sprofonda ciù a se dixe “Superba”, succede incangio che un oggetto volumminoso ma ch’o no fa mâ, defilou – donca de nisciun imbarasso –, pe de ciù no sensa unna çerta seu peculiaritæ tecnica e unna valensa testimoniâ, trattandose de l’urtimo gasòmetro ch’o l’é restou, o vëgne stupidamente liquidou comme unna “rumenta”, comme un rottamme ruzzenento, inutile e vegio, mastegando torna e mâ, into 2020, o mito do “neuvo”, comme succedeiva in Occidente avanti da crixi petrolifera. Do resto, a l’é giusto a mæxima Zena che a definisce antiquæ i tram, tanto che o resto d’Euröpa a l’é apreuvo à introduli torna, che a l’accheugge entuxiasta un neuvo çentro commerciale (ingiarmou da Palasport), mentre in genere ormai no se fa ciù, che a conscidera e piste ciclabili un affronto a-o “sacrosanto diritto de usâ a machina”, e a manifesta unn’insofferensa montante pe-e zöne pedonali, tanto che o mondo civile o procede in direçion oppòsta areo. Se pöi conscideremmo che à asbriâse contra o “vegio” gasòmetro a l’é pròpio unna popolaçion fæta pe-o ciù de ançien, l’é diffiçile no pensâ torna à Jung e a-a seu Lezze do Spegio, ò domandâse ciù semplicemente: da che purpito?