A battaggia a continua

O 2020 o l’é stæto l’anno de l’emergensa sanitäia mondiaLe caxonâ da-o virus Covid-19, e a pandemia a n’à mostrou a fragilitæ e l’inadeguatessa de sto scistema soçiale; basou in sce l’ingiustiçia, in sciô sfruttamento de risorse naturali e umañe. Ma a mæxima pandemia a n’à anche dimostrou che, reconosciua l’attuale emergensa e confirmâ l’urgensa de agî pe contrastâla, emmo avuo e capaçitæ de cordinâse, de travaggiâ insemme pe-o ben de l’umanitæ.

Ma unn’atra crixi assæ ciù profonda a l’é apreuvo à invade e nòstre vitte da di dexenni in sà, quella climmatica; crixi che, a-o conträio do Covid-19, a no l’é mai stæta consciderâ e affrontâ co-a giusta consapevolessa e co-o coraggio neçessäio, con tutto che e soluçioin existan za da do bello. Perché? Perché no gh’é a voentæ politica e econòmica pe fâlo. Perché ancon gh’é chi mette in discuscion a sciensa e e catastrofe che delongo de ciù destruan o nòstro ecoscistema.

À parlâ son i milioin de zoeni do mondo che ammian à l’avvegnî con poia. Poia de finî e risorse, poia da mòrte generâ sempre ciù da-e guære pe famme, sæ e migraçioin de massa, poia de marottie che inquiñan i nòstri còrpi e avveleñan e nòstre mente, poia de no poeise manco permette de aveighe di figgi. Tutte poie che i grendi no preuvan, perché liatri avian ancon o lusso de poei moî de vegiäia, e son quelli mæximi grendi che purtròppo piggian ancon e decixoin no à l’ertixe pe gestî o cangio climmatico, e conseguense do quæ pesian in sciâ nòstra vitta, no in sciâ seu.

Ve â chì a differensa tra Covid-19 e emergensa climmatica: o primmo o caxoña a mòrte de tutti, a segonda solo di urtimi e de chi vëgne dòppo. Deduçion? No l’é pöi coscì urgente agî...

Da-o 2018 graçie à Greta e a-o travaggio de tutto o movimento di Friday For Future, a costion ambientale a l’é stæta riportâ a-o çentro de un debà che l’opinion pubrica a l’aiva ignorou tròppo de soventi, pe corpa di media distræti e de unna classe politica ignorante e egoista, tanto che i mercoei gh’anava ben coscì. Ma no se poemmo tegnî pe satisfæti perché inte sti doî anni de attivismo semmo consapevoli che a quantitæ de attençion guägnâ a contëgne tròppa pöca qualitæ. Perché se sentimmo dâ delongo unna patta in sciâ spalla, tanto che o fäso fattoriso de chi o ne governa o ne fa capî che ninte de concreto saià fæto, in realtæ. Perché se rendemmo conto de quante tutta sta scituaçion a segge estremamente ridicola: i zoeni sätan a scheua pe dâ unna leçion a-i grendi. Semmo stuffe e stuffi de ripetilo. I incendi, e borrasche, a sessia, a distruçion de accuggeite, e alluvioin e e migraçioin climmatiche no son à basta pe convinçe che a scituaçion a l’é drammatica e despiâ. Intanto e emiscioin continuan à cresce, allontanandone sempre ciù da-o percorso seguo pe stâ sotta à 1,5 °C de surriscädamento avanti do 2030.

E oua cöse faiemo, se arrendiemo? Mai. À costo da nòstra vitta, che stemmo za mettendo à rischio aspëtando de promisse che savemmo no vegnian mai mantegnue. No sätemmo a scheua perché no n’é cao studdiâ, ançi, vorriëscimo poeilo fâ in tranquillitæ; sätemmo a scheua perché se a crixi climmatica a no vegnià gestia comme unn’emergensa, semplicemente no aviemo un avvegnî into quæ vive e diventâ quello pe-o quæ studdiemmo. E se o cangio o no vëgne da l’erto ò da-a generaçion che a l’aviæ dovuo lasciâne un mondo bello, ò a-o manco vivibile, aloa saiemo niatri quello cangio: niatri zoeni unii do mondo pe un avvegnî e unna giustiçia climmatica, ve mostriemo à vive.