A scinistra in scilençio a renonçia a-a speransa

Comme previsto in Liguria o l’à vinto o Toti, ma l’è à livello generale che a scinistra, da-a Liguria à l’italia, da l’euröpa a-o mondo, a l’à perso a seu carrega vitale, o seu ëse elemento innovatô e progrescista, a seu vocaçion maggioritäia. A no l’è unna scoverta, e a lettiatua in sce l’argomento a l’è sconfinâ, però gh’è unna seria de elementi neuvi, emersci con fòrsa inte st’urtimo anno, che pòrtan à svòlze çerte riflescioin che se sentan ancon tròppo pöco.

Segge a costion ambientale, tornâ pe fortuña a-a ribalta graçie a-o movimento di Friday For Future (veddi à pag. 3 l’articolo de Francesca Ghio) e a-e açioin de Extinction Rebellion, segge a pandemia inta quæ semmo ancon appoxi, mettan ògni giorno in evidensa comme o scistema econòmico ch’o s’è anæto formando inti urtimi duxento anni o no segge adatto à fâ fronte a-e exigense do nòstro secolo.

Insemme à questo, manifesta a seu inadeguatessa anche i scistemi politichi che ghe fan da protettoî, e se in scî regimi totalitäi, autoritäi e illiberali, da-a Ciña à l’India, da-a Ruscia a-a Turchia – ma a lista a l’è longa – gh’è pöco da dî e da aspëtâse, e democraçie ascì demonstran de no ëse oua comme oua un terren fertile pe un superamento in megio de l’attuale scistema econòmico. Questo, in boña parte, pe caxon do retiâse de unna scinistra – inteisa in senso largo, a-o delà di partii politichi – che a l’à abandonou de maniman e istanse econòmiche, pe mantegnî comme træti differençiali e battagge civili, importanti de seguo, ma insufficienti.

O discorso econòmico da scinistra, pe poei mantegnî unna seu attualitæ, o dev’ëse misso delongo à giorno, e quande no se fa succede che a seu vigensa a s’ammerme, caxonando anche a disperscioin de conquiste precedenti (comme çercan de spiegâ à pag. 3 Camilla Ponzano, Lorenzo Calza e Irene Tamagnone, e à pag. 4 Amina Gaia Abdelouahab, ognidun co-o seu linguaggio). A vixon da drita, sorviatutto de quella – trionfante – che ciù che pe-o mercou a l’è pe-o business, a l’è ben ben ciù façile da propoñe, a va ben pe tutte e stagioin e a no domanda agiornamenti. A fa leva in scî istinti, a no se poñe l’obiettivo de megioâ a condiçion umaña, a refua ascì a complescitæ da realtæ, negando a relaçion tra l’attivitæ econòmica e i cangi climmatichi, e disegualianse, eccetera, comme se l’economia a fïse unna dimenscion separâ da-e atre, contesse solo a produçion e o consummo, e o resto o no fïse rilevante. Mascherou in mòddo ciù ò meno ipòcrita, l’atteggiamento da drita pe-o business o l’è quello de chi o no veu seccatue, o veu fâse i affari seu sensa dovei pensâ a-i riflesci che an a-o delà de quelli che o peu constatâ in sce de lê.

No peu donca che passâ da scinistra, se a gh’è, a rispòsta a-e grendi sfidde de sto secolo, e inte sto senso no ghe porrieiva ëse ciù attualitæ into pensâ, into professâse, into portâ o pròpio contributo à sta parte. Perché aloa pâ che a segge apreuvo à sparî da-i orizzonti, primma colturali che politichi, de societæ contemporanie?

Sciben che o l’è un discorso longo, e che inti meixi chi vëgne proviemo à affrontâlo chì e da atre parte, unna cösa a se peu dî, òssæ che a mancansa de applicaçioin pratiche e reali de un scistema differente e megiô, o fæto che no se pòsse vedde da nisciuña parte unna societæ ch’a se reze e a fonçioña ben segondo di atri prinçipi che no seggian quelli do business, o fa scì che se tëgne l’alternativa pe imposcibile. A mancansa ascì do studdio, inte universcitæ e inti çentri de riçerca, de di modelli alternativi de economia e organizzaçion soçiale a rende ancon ciù diffiçile l’emerge de iniçiative inte sto senso. In sce questo o l’aiva raxon o Bernanrd Stiegler, che inti urtimi tempi o l’anava sostegnindo, co-o progetto Inernation, che l’ea interesse de Naçioin Unie finançiâ, con unna parte de seu risorse, o tentativo de inandiâ inte de zöne definie, limitæ, un scistema econòmico differente. Pròpio pe demonstrâ che o l’è poscibile, che o peu existe inta realtæ.

Ma chì vëgne feua un atro tema, che o l’è ligou da vexin à quello de primma, saiva à dî o retardio di scistemi politichi, e mascime da forma do stato-naçion, into frontezzâ in mòddo virtuoso e neçescitæ do secolo. Perché, pâ evidente, a no l’è a forma do stato-naçion quella ch’a rende ciù façile o cammin pe-o cangio neçessäio do paradigma econòmico, benscì quella de regioin, de äie metropolitañe, de bioregioin, di territöi, rinforsæ e dotæ de potere politico, comme base de unna neuva construçion europea, magara ristreita a-i soli stati donde a democraçia liberale a reze ancon. Da chì dovieiva ripartî a scinistra, da-a comprenscion de costioin terrritoiali ligæ a-i scistemi politichi e democratichi, perché l’è solo da un cangio de questi che se peu repiggiâ o fî do seu discorso econòmico, che o deve portâ a-o superamento – e no solo à alleviâ i danni – do scistema econòmico dominante. Sensa parte econòmica a scinistra a renonçia a-a vocaçion maggioritäia. Ma se no raxonemmo con libertæ e con urgensa, no allamentemmose pöi do populismo e de l’egemonia da drita.