Robert Musil, Der Mann ohne Eigenschaften, 1930

Walter e lê ean stæti zoeni into tempo, ancheu ascordou, vegnuo apreuvo à l’urtimo cangio de secolo, quande tante gente s’inluddeivan che o neuvo secolo ascì o fïse zoeno.

Quello tòsto interrou o no s’ea distinto guæi guæi inta seu segonda meitæ. O l’ea stæto effiçiente into sviluppo tecnico e inta riçerca scientifica, ma feua da quelle bordonnæ da seu energia o l’ea mutto e miödin comme unna paludde. O l’aiva dipinto comme i clascichi, poetou comme Goethe e Schiller e construio e seu case in stile gòtico e rinascimentâ. E exigense ideali presiedeivan à tutte e manifestaçioin da vitta, comme un còrpo de poliçia. Ma pe caxon de l’occulta lezze ch’a no consente à l’òmmo l’imitaçion sensa conzonzila con l’esageraçion, tutto o l’ea improntou à un conformismo artistico da-o quæ i archetipi ammiræ ean belli lonten, e do quæ se peu ancon in giornâ vedde ben i segni inte stradde e inti musei; e che sto chì o se ghe connette ò no, e dònne de quello tempo, tanto pue quanto ritrose, doveivan portâ di röboin che da-e oege ghe chinavan zu scin à tæra, ma exibî un sen inscio e un panê esuberante. (...).

E l’é tutte e vòtte comme un miacoo, quande à di anni de coscì ciatto e lento avvilimento intravëgne unna picciña montâ spirituale, comme l’é successo aloa. Da-a mentalitæ, liscia comme un euio, di urtimi doî dexenni do secolo dixineuven l’ea insòrto tutt’assemme in tutt’Euröpa unna freve vivificante. Nisciun o saveiva ben cöse fïse apreuvo à nasce; nisciun o l’aviæ posciuo dî se saieiva stæto unna neuva arte, un òmmo neuvo, unna neuva morale ò magara un neuvo ordinamento da soçietæ. Donca ognidun ne diva quello ch’o voeiva. Ma dapertutto se levava di òmmi à combatte contra o passou. (...). Se ammava o superòmmo, se ammava o sottaòmmo; se adoava o sô e a salute, e se adoava a fragilitæ de figgeue maròtte de consunçion; se professava o culto de l’eröe e o culto soçialista de l’ummanitæ; s’ea creddenti e scettichi, naturalisti e raffinæ, gaggiardi e morboxi, se seugnava antighe allee de castelli, parchi autunnali, peschee de veddro, gemme preçiose, hascish, marottia, demòni, ma ascì praterie, orizzonti sconfinæ, fuxiñe e laminatoî, lottatoî patanui, rivòlte de operäi scciavi, primmi progenitoî de l’òmmo, distruçion da soçietæ. Se capisce, ean contraddiçioin e crii de guæra assæ antitetichi, ma aivan un respio commun; chi o l’avesse vosciuo scompoñe e analizzâ quello periodo o l’aviæ trovou un nonsenso, quarcösa comme un çercio quaddrou fæto de færo ligneo, ma in realtæ tutto s’ea amargamou e o l’aiva un senso abbarlugante. (...).

Se no se veu, no occore donca sopravaluâ quello lontan “movimento”. Sto chì o s’é svòlto do resto solo into seu sottî e incostante di intellettuali, che da-e persoñe – ancheu, graçie a-o segnô, torna à galla – munie de un indistruttibile conçetto da vitta, o vëgne concordemente desprexou; e o no l’à influio in sciâ massa. À tutti i mòddi, sciben che o no l’ea stæto un avvegnimento stòrico, o l’ea à conti fæti un avvegnimento, e i doî amixi Walter e Ulrich da zoeni n’aivan visto ancon a coa. (...). Cöse, donca, o l’ea anæto stòrto? (...). No se poeiva assolutamente indicâ quarche scingolo caxo che o no fïse stæto poscibile anche primma, ma tutti i rappòrti s’ean un pittin mesciæ. Idee che ean parsciue de scarsa validitæ piggiavan conscistensa. Persoñe de quæ avanti se tegniva pöco conto, oua conosceivan a glòria. E asperitæ se levigavan, e divergense convergeivan torna, i indipendenti pattezzavan co-o successo, o gusto za formou o tornava inçerto. (...). No se peu dâ a corpa à nisciun. No se peu manco dî cöse segge stæto. L’inzegno e a boña voentæ no mancan de seguo, e manco e persoñe de carattere. Manca solo tutto e ninte; se diæ che o sangue o segge muou, ò l’äia; Unna marottia misteiosa a l’à distruto a picciña genialitæ de l’iniçio, ma tutto o luxe de novitæ e in sciâ fin no se sa ciù se o mondo o l’é in davei pezoou ò se niatri solo semmo inveggii. Aloa l’é comensou in davei unna neuva era.