O mercante d’arte che manca à Zena

Existe unna fotografia do 1970 circa ch’a mostra l’antiquäio zeneise Severino Crosa into seu appartamento de Palaçio Granello in ciassa Giustinien. Severino Crosa o l’é stæto un grande mercante vegio stile, bon à raccheugge di cappolavori artistichi into tempo into quæ a societæ zeneise de prestigiose famigge aristocratiche a l’anava za declinando fatalmente. À partî, in realtæ, da-a segonda meitæ do XIX secolo unna neuva borghexia imprenditoriale a s’anava affermando e a regattava pe conquistâse e glöie artistiche de quande Zena a l’ea in davei unna repubrica baxâ da-a ricchessa e da-o potere.

E colleçioin di Luxoro, di Bertollo e dapeu de Angelo Costa (primmo Prescidente de Confindustria) testimònian pròpio sto passaggio soçiale. E à sta domanda rispondeiva con fòrsa crescente l’affermaçion de de figue de antiquäi che son stæti, à tutti i effetti, tra i megio do mondo.

Luigi Wannenes o peu fòscia ëse consciderou o pioniê de sta neuva figua de profescionista in senso moderno. Do 1855 o converte a bittega de tappessê in Ciassa da Stampa inte un “Deposito di oggetti d’antichità e belle arti” e o diventa fito un di ciù attivi e ricchi mercanti d’arte in çittæ, rendendose protagonista ascì da vendia de un presunto Raffaello à Raffaele de Ferræ – vicenda assæ ciættezzâ, unna vòtta che o compratô o s’é reiso conto de l’effettiva modesta qualitæ do dipinto.

Into tempo se van à creâ de intreghe generaçioin de antiquäi e mercanti: Giuseppe Levi, i Montarsolo, i Villa (che do dexembre 1923 mettan in vendia tutta a seu colleçion), e dapeu – scuggiando de maniman inti anni – Piero Pagano, Lazzaro Vivioli e Mario Panzano. Inte seu man l’é passou di cappolavori avvardæ ancheu inti musei i ciù prestigioxi do mondo, e a seu attivitæ a l’à permisso che se ritrovesse de euvie disperse inti secoli, contribuindo in mòddo attivo a-i studdi da stöia de l’arte.

O progrescivo declin da borghexia zeneise o l’à pe fòrsa de cöse coinvòlto anche i antiquäi. E, sciben che o posso zeneise o segge ancon flòrido e frequentatiscimo da-i grendi mercanti internaçionæ, chì in çittæ giamiña à affermâse unna figua de profescionista in senso moderno, saiva à dî bon à osservâ a serietæ di erti standard qualitativi internaçionæ. Son però presenti træ grendi case d’asta, tra e megioî d’Italia, che se ostiñan à fâse concorrensa tra de lô sensa capî che da unna seu conlaboraçion porrieiva nasce a ciù grande realtæ italiaña. E proverbiali propenscioin a-a rattella e a l’individualismo, inte sto caxo ascì, traccian i contorni de unna çittæ sempre ciù votâ à un insanabile destin de picciña provinsa.

Inte sto contesto lacunoso e inorbio da de rivalitæ picciniscime, a s’arreixa e a cresce a cianta gramma di presunti “connoisseur” che, con un euggio à l’arte e l’atro a-o pan, inquiñan o campo con mostre e pubricaçioin de qualitæ discutibile. Pe no parlâ de seu tendençiose attribuçioin a-i grendi meistri zeneixi de di dipinti ordenäi da banchetto che finiscian in sciô mercou pe scontrâse co-a realtæ di fæti, restando invendui ò aggiudicæ à un impòrto ridicolo.

Sto chì ascì, sciben che meno vixibile rispeto a-a speculaçion ediliçia, o l’é à tutti i effetti unna distruçion do nòstro territöio, che a no rende giustiçia a-a nòstra magnifica stöia de l’arte.