Ritorno a-e fabriche

Semmo a-o DLF da val Ponçeivia derê à presentâ O Stafî, se parlava de l’articolo in sciô gasòmetro (O Stafî, numero 5, settembre 2020, pag. 3) e dòppo 10 menuti un scignoro ançian o troña da-o pubrico: “il gasometro è una rumenta, bisogna abbatterlo”.

O seu nomme o l’è Giuseppe Ariotti, o l’à 80 anni e inte quell’epoca industriale donde Zena a l’ea a “Grande” (1880-1980) o gh’ea immerso. “Ma lei lo sa che mestiere facevo io? Io ho la terza media e facevo l’operaio ‘a caldo’ in Italsider. Ero un fornellista”. Se femmo rebellâ drento a-o racconto. O Ariotti o no l’aveiva coæ de studdiâ: à 14 anni o fava o bòccia inta fabrica de mòbili de via Fillak e o guägnava 70.000 lie. O poæ o l’ea operäio in Italsider, ma o l’arriondava faxendo o careghê. Do 1970 o poæ o ghe lascia o pòsto, e o Ariotti o l’intra a-o reparto di atoforni con un primmo saläio de 100.000. O stava in Ponçeivia e no solo i zeneixi, ma ascì e gente do Piemonte e da tutta a Liguria vegnivan à louâ e à stâ inte quella valle, perché gh’ea o travaggio. I atoforni, inta vegia produçion de quelli anni, ean i Siemens-Martin, e solo into seu reparto trovava occupaçion 4 squaddre da 60 òmmi, che gestivan e operaçioin de ripristino di refrattäi e de l’amianto che rivestivan tutto, da-i atoforni a-e sivee, a-i cari ghisa, saiva à dî a-i “sciluri” drento a-i quæ a ghisa à 1.300 graddi a coava pe ëse transportâ feua da l’acciaieria in sciô binäio “sommergibile”, ch’o corriva longo o letto do Ponçeivia, rasentando e case di ferrovieri de via Porro. I atoforni martin ghe metteivan 4 oe à fâ unna coâ da 150 tonnei; quande î an cangiæ con quelli americhen s’è passou à 180 tonnei inte 45 menuti. I forni americhen ean comme de grendi betonee e a squaddra do Ariotti ògni tanto a doveiva anâ sotta à strenze i bolloin di seu fondo, e poeiva capitâ che un “tettin d’äsâ” ch’o se formava in scê ciarnee di forni che giavan o se stacchesse, e solo pe un destin stranio o no l’anesse à sciaccâ a squaddra de Ariotti. “A-o baccan gh’è vegnuo da patî perché niatri doveivimo ëse lì sotta. Gh’ea stæto un retardio e quello retardio o m’à sarvou a vitta, à mi e à atri 30 òmmi. O “tettin’ d’äsâ” o l’è vegnuo zu donde niatri doveivimo ëse. Ste cöse succedeivan!”.

O Ariotti o l’anava à riparâ i forni e e sivee, perché capitava che s’arvissan di squarsci: a ghisa a coava pe tæra e i òmmi, protetti da un longo cappòtto in laña drua de 15 cm, co-i elmetti in plastica che se ghe deslenguavan in sciâ testa, i seuccai in legno che piggiavan feugo, intravan in açion à un à un, pe no ciù de 3 menuti perché l’ea imposcibile rexiste de ciù à quelle temperatue: tiavan via a lava e favan a “pessa” a-o pertuso con di moin refrattäi e seu (strati) de amianto che taggiavan à man. O Ariotti o deuviava a maschera, “io mi proteggevo”, ma in geneâ no se saveiva ben che conseguense in sciâ salute gh’aviæ avuo quello respiâ pua d’amianto ò de cròmmo esavalente. “O l’arrivava à sacchi, da-a stoppani, niatri ô ciammavimo Kr. I operäi arvivan i sacchi de Kr pe cacciâlo inte l’impasto. L’importante l’ea no cazze drento à l’atoforno, eimo formæ pe quello”. A-o Ariotti l’Italsider a gh’à fæto piggiâ a tersa media, pe diventâ capposquaddra. Pöi Riva, o “privou”, o ghe dava fiña i premmi de produçion in busta se e coæ anavan à bon fin e no se straggiava o materiale. I figgi do Ariotti travaggian: un o fa l’operäio inte unna ditta, l’atro o l’è avvocato à Zena. Ma tanti figgi di operäi da generaçion vegnua apreuvo à quella do Ariotti pe travaggiâ an dovuo anâ via. Quello gasòmetro, do quæ se parlava in sciô Stafî, o no representa ninte pe lê e pe tanti da seu generaçion; tanti de quelli che travaggiavan à 1.300 graddi co-i mori coverti de caize. O sagrifiçio lavorativo da generaçion do Ariotti o no l’à garantio un megio futuo diffuso, unn’asceisa soçiale pe-i figgi, a-i quæ i operäi co-i seu saläi poeivan dâ a poscibilitæ de studdiâ à l’universcitæ. Ven da pensâ che o gasòmetro e e äie industriali dismisse seggian pe liatri comme o scimbolo de un tradimento. No s’è ancon averto unna neuva era de travaggio e a çittæ a s’è spopolâ. L’è restou di giganti abandonæ de quell’epoca, ma de quell’energia produttiva “non esiste più nulla”, comme o l’a ripetuo diverse vòtte o Ariotti. Perché no se tratta solo do gasòmetro, ma de unna narraçion ch’a no segge solo materiale, ma ascì inmateriale, pe arvî di scenäi neuvi de re-uso museale, re-uso produttivo ò demoliçion. O debà o no peu ëse solo pe-i “addetti ai lavori”, urbanisti ò amministratoî. Emmo da stâ à sentî, e da meditâ.