Tra l’òmmo e a machina se zeuga o nòstro futuo
Ma pâ che no ô savemmo

“Ëse umen e machine”, rapresenta da sempre o futuo imediou da çiviltæ. Antonio Gramsci o l’à dedicou un raxonamento importante de “Nozioni enciclopediche” a-a “machina” (Quaderno 8, XXVIII, § 90), distinguendo tra e machine motrici e quelle utenscili (Antonio Gramsci, Quaderni del carcere, a cura di V. Gerratana, Milano, Einaudi, 2007). Son e machine che amplian e capaçitæ de l’òmmo de realizzâ e quelle che se sostituiscian à l’òmmo. Gramsci o l’à invocou into seu raxonamento o passaggio tra antighitæ e modernitæ. Marx do resto o l’aiva sottoliniou comme i cangi di cicli produttivi ligæ a-o progresso tecnològico avessan un effetto in sciô “capitale”, in sce l’economia da societæ ch’a î avesse missi in atto, in termini de ciclo produttivo. Se capisce, ancheu, comme l’adoçion de neuve tecnologie a no libere “capitale” ma a ô vincole, into senso ch’a ne transforma a porçion variabile, ligâ a-o saläio di lavoratoî, in capitale fisso dæto da-o costo de machine, da-a seu manutençion e da-o seu aggiornamento.

Con sta premissa affrontemmo a construçion che no poemmo sghindâ do neuvo scistema soçiale, a-a quæ semmo apreuvo à asciste con çercâ de affrontâ l’impatto de neuve tecnologie in sce l’ëse uman e in sciô scistema soçiale mæximo. In parallelo ghe va a renoelâ a perçeçion do rappòrto tra sciensa e tecnologia e a relaçion tra a qualitæ da vitta e o tempo dedicou a-o travaggio stòrico de nanotecnologie e do Covid-19 (A. Diaspro, “Il pane e le rose per umani e umanoidi nel tempo delle nanotecnologie”, Critica Marxista, pp.45-48, marso-arvî 2019). L’é passou ben ben de anni da-e icòniche scene cinematografiche de “Tempi moderni” de Charlie Chaplin, ma à quelle pâ che segge tornou l’imaginäio collettivo.

A vertadea mutaçion antropològica a l’ea stæta analizzâ da Gramsci into seu reciammo a-o fordismo (Quaderno 22) con l’estençion a-e relaçioin umañe di metodi e di valoî da produçion de massa, ch’a vegniva proiettâ into memorabile afresco chaplinian da cadeña de montaggio, istantanea de quello “maggior sforzo collettivo verificatosi per creare, con rapidità inaudita e con una coscienza del fine mai vista nella storia, un nuovo tipo di lavoratore e di uomo” (A. Gramsci, “Americanismo e fordismo”, Einaudi 1978).

Se ripercorrimmo i momenti inti quæ e tecnologie s’en espresse con fòrsa revoluçionäia trovemmo che pöco o l’é cangiou. Pensæ a-a machina tescile, a-o treno, à l’automòbile ò ascì a-o carcolatô elettrònico. Son restæ tali e quali comme quell’imagine che ei bella ciæa de quande se spandeiva pe-e stradde o crio “figgeu! O l’é arrivou o mollitta, che de vòtte o l’aggiustava anche i pægua!”. Un tiâ in sciô quæ tesce, colisse pe-i vagoin, quattro reue e un volante e velocitæ de carcolo e tanta memöia a-o stato sòlido, ninte de ciù. Aloa a revoluçion a s’é fermâ lì. Ma e nanotecnologie, quelle de Richard Feynman, quelle contæ i 22 de dexembre do 1959 a-o Caltech, o tempio de tecnologie (R.P. Feynman, Il piacere di scoprire, Milano, Adelphi, 2002), son unna vivagna de cangiamento continua. A matëia inanimâ e quella vivente son fæte de atomi, regordava o Feynman.

E tecnologie diventan fito bio-nano-tecnologie, à regordâ o vivente, bio, e quella scaa metrica ch’a se còlloca a-a dimenscion de un cavello scciappou inte çentomia parte, o miliardeximo de metro. A-a nano-scaa intravëgne i “zeughi” che ne fan vive: DNA e proteiñe che dinamicamente evòlvan e scangian informaçioin in cellole, tesciui e òrgani. Òrgani, quelli che inte unna societæ ch’a l’inveggisce fonçioñan no pròpio comme vorriëscimo into nòstro còrpo. Te ê lì aloa e machine motrici e utenscili.

Poemmo acquistâ in farmacia unna man artificiale da montâ sensa intervento chirurgico in sciô nòstro avambrasso pe acquistâ torna, graçie à di delicæ e discreti elettrodi che “sentan” o nòstro stimolo moscolâ, de abilitæ manuali che pensavimo perse. Tornemmo inte un momento à arvî con graçia unna picciña arbanella de marmellata, à zugâ à carte co-i amixi ò à açionâ un tornio. Se o nòstro movimento o l’é fäsou da unna tremmaxon fruto de unna marottia neurodegenerativa, poemmo contrastâlo con un dispoxitivo elettrònico e poemmo deuviâ o pensceo pe realizzâ unn’açion con un atro còrpo, segge questo uman ò umanòide.

Scì, poemmo fâ leze à un “elmetto elettrico” i nòstri segnali cerebrali che, opportunamente decodificæ, son in graddo de esprimme a nòstra intençion de beive, de piggiâ un libbro e de raccheugge un fiore. O mæximo segnale elettrico, ricodificou, o saià attuou, realizzou, da un atro ëse uman ò da un robot. O robot o l’é ancheu intuitivo e o sà cheugge inte quelli movimenti imperçettibili che manco un zugou de poker o sa capî, a nòstra intençion de passâ unna bottiggia d’ægua – Coppi verso Bartali ve dixe quarcösa? – di tiâla ò de ascondila. Emmo impreiso da-o porpo e da-e seu brasse intelligenti, ò da-a vigna comme mesciâse magara pe razzonze unna persoña sotterrâ pe-o deruo de unna casa. Semmo into tempo into quæ e nòstre molecole, RNA e DNA, se transforman in sentinelle pe unna marottia e coran à l’assosto instruindo atre molecole e construindo de neuve proteiñe pe tempo. Tanti meccanismi no l’emmo capii, e î capiemo se saviemo dâ valô e gambe a-a riçerca scientifica de base, a sola boña à produe un sato tecnològico neuvo, un sato colturale e de paradigma, a-a velocitæ di cangiamenti climmatichi e ambientali che permean e nòstre vitte.

Do 1982 Neil Young o realizzava un album, “Trans” (Geffen Records), che o l’aiva unna covertiña ch’a l’antiçipava a machina ch’a “guidda da sola”, e con “Transformer man” – da leze “transformatô elettrico uman” – o stabiliva o contatto cerebrale do pensceo co-o figgio cerebroleso, constreito in sce unna carrega co-e reue ch’a se mesciava con un telecommando. Inte sto “tripudio” de tecnologia d’avanguardia a-o serviçio de l’òmmo Neil Young o no poeiva fâ à meno, pe tutti niatri, de deuviâ i scintetizzatoî, a drum machine e a seu voxe filtrâ pe transformâ quello che porriësci definî un andròide sensa anima inte un ëse vivente, tâ pe-a seu capaçitæ de esprimme amô infinio verso o pròscimo inte quelli versci che seunnan coscì: “tutte e mattin quande t’ammio inti euggi, me sento elettrificou da ti, oh yeah”.