A generaçion perdua da Fransa

Quarche fæto: venerdì 16 de ottobre un professô de medie inte unna periferia “tranquilla”, à 40 chilòmetri da Pariggi, o vëgne decapitou davanti à scheua da un terrorista islamico de 18 anni (mòrto pöi da “martire” into scontro co-a poliçia vegnuo apreuvo). Dexe giorni avanti, o professô Samuel Paty o l’aiva mostrou à unna classe de tersa media de carregatue à sfondo religioso into corso d’Educaçion Civica. Obiettivo: parlâ de libertæ d’esprescion inte un paise ancon traumatizzou da l’attentou à Charlie Hebdo.

L’é di anni che a “libertæ d’esprescion” a fa parte di programmi d’insegnamento de medie, inte un paise comme a Fransa, laico, donde l’oa de religion a no l’existe e e religioin peuan ëse abbordæ solo comme fæto stòrico e colturale inti corsci de Stöia ò Educaçion Civica. O Ministero de l’Instruçion purtròppo o no fornisce a-i professoî nisciuña linia guidda particolâ pe trattâ sti temi, ma o se trincea derê à doî prinçipi de spesso in contraddiçion: a “libertæ d’insegnamento” da unna parte, e l’avvoxou “pas de vagues” da l’atra (o se peu tradue con “pöco casin”).

O professô Paty, senscibile, erudio e con unna vocaçion à formâ di çervelli pensanti, da tempo o l’aiva trovou “un mòddo” pe parlâ de ste cöse a-i seu allevi, con un mesccio equilibrou de vignette irriverenti pe tutti (cattòlichi, mossulmen e ebrëi) e sorviatutto con tanta attençion a-o seu pubrico zoeno: o prevegniva pe tempo, invitando chi o no voeiva miâ à giâ o sguardo. Ma purtròppo, à iniçio ötobre, inte quella classe de tersa media, quarcösa o l’é anæto de traverso. Cöse?

A leçion a fa discute i figgeu inti corrieu, e unna zoena de religion mossulmaña, no presente a-o corso, ripetente (a figgia a l’à chinz’anni) a s’â fa contâ da atri, relatando dapeu tutto a-o poæ e à un “seu amigo” (un autoproclammou imam fondamentalista, segnalou a-i serviçi segretti françeixi pe-a radicalizzaçion). E o maccanismo infernâ o se mette in möto, amplificou da-i soçial-networks: o professô o l’é denonçiou da-o genitô e da “l’amigo”, i supeioî do professô zinzañan e no ô protezzan, e inte meno de 10 giorni un zoeno richiedente asilo cecen, ch’o sta à 200 chilòmetri da-a scheua e o s’é radicalizzou in sce internet, ô decapita o giorno primma de vacanse.

Diverse incongruense inta reaçion de autoritæ franseixi fan capî che o professô o no l’e’ stæto sostegnuo à dovei ni da-a gerarchia (pâ che o stesse pe ëse sançionou), ni da-e autoritæ (o l’aiva depoxitou unna contro-denonçia pe calunnia, sensa do resto riçeive un sostegno psicològico e legale adeguou da parte da scheua, che ançi a l’aiva riçevuo in mòddo assolutamente irrituale o poæ e o “seu amigo”, pe çercâ de risòlve o problema con “pöco casin”). E sto chì o poñe de belle domande à unn’instituçion comme a scheua pubrica che oltre à dovei instruî e formâ di zoeni de tutte e origine soçiali, etniche e religiose, a deve unîli ascì in nomme di valoî communi, democratichi e repubrichen (Liberté, Egalité e Fraternité).

Imposcibile fâsele tutte, e domande, ma provemmo con doe, a-o manco: perché scheua e autoritæ no an capio che o professô Paty o l’ea in peigo, agindo de conseguensa? Perché i attacchi terroristichi in Fransa son pe-o ciù commissi da di zoeni?

In apparensa a scheua franseise (in boña parte pubrica) a pâ ciù egualitäia de tante atre. Anni de abandon e un sottofinançiamento preoccupante, do quæ nisciun di urtimi governi o l’à vosciuo assummise a responsabilitæ, an do resto transformou a scheua de l’òbrigo franseise da-o strumento de integraçion ch’a voeiva ëse inte un esaltatô de differense e de tenscioin latenti: e frattue soçiali e spaçiali vixibili, inte tante çittæ e periferie de Fransa (comme altrove) son ancheu portæ à l’estremmo da-a scheua, donde un’omogeneizzaçion inquietante (ghettizzaçion) de classe a l’é ormai a nòrma.

N’ò fæto mi mæxima l’esperiensa diretta into mæ primmo anno de tirocinio. Mi mæxima inmigrâ e de cô, insegnava Lettere inte un liçeo profescionâ e ò provou à fâ leçion in sce “Colonizzaçion e Scciavitù: o tema do Bon Sarvægo”. In virtù do famoso prinçipio do “pöco casin”, primma i mæ formatoî, dapei i mæ colleghi, m’an conseggiou de lasciâ perde. Convinta da neçescitæ pe-i mæ allevi de 16 anni, a-o 100% figgi ò nevi de inmigræ, de confrontâse in sce sto tema, son anæta avanti. E son stæti pròpio liatri à convinçime da grandessa e da portâ do problema. In prinçipio, i allevi an deciso compatti de no parteçipâ a-a discuscion. Dapeu un de liatri o se risòlve à risponde a-a mæ domanda inscistente, “perché sto scilençio?”, giassandome: “voscià ascì scià l’é figgia de inmigræ, ma se scià fïse stæta gianca gh’aviëscimo avuo un problema”. Pe continuâ, dapeu: “Madame, à cöse serve parlâne? Scià n’ammie, vegnimmo tutti da inmigræ: nisciun chì o n’à mai vosciuo. À cöse serve parlâ de ste cöse tra de niatri? No cangià ninte”.

Da alantô, tutti i anni ritreuvo i mæximi discorsci de desolaçion in scê bocche de sti zoeni franseixi “discendenti da” (ghe n’é pe coscì, sempre de ciù, perché tutti vegnimmo da quarche parte: l’é sto chì o senso de appartenensa communitäia esacerbou in giornâ da-o social network, e purtròppo anche da-i fondamentalismi de varia natua). Desolaçion delongo mescciâ à òdio e desprexo: discorsci oscui in sciô ròllo de dònne inta societæ – unna subordinaçion che ormai sempre ciù dònne zoene accettan – insulti squæxi solo à carattere razziâ, unna desilluxon e unna farta de speansa che ciòccan co-i seu 16 anni. Desolaçion ch’a pòrta delongo ciù de spesso à di drammi comme quello do professô Paty.

Inte sto contesto estremmamente preoccupante, i soli prinçipi de “libertæ de insegnamento” e do “pas de vagues” peuan fonçionâ? No, sensa unna voentæ politica ciæa e un cian preciso de lòtta contra l’escluxon soçiale e e derive communitäie che ormai miñan e reixe da scheua pubrica franseise. O governo attuale, inte un contesto reiso compricou da-a pandemia, da-a crixi econòmica e da-i attacchi terroristichi, o pâ ciù inclin à l’autocensua, e o no l’é bon à capî i messaggi che vëgnan da-o còrpo insegnante. Lunesdì 2 de novembre, giorno de rientro da-e vacanse, o Ministero de l’Instruçion o l’à instituio un menuto de scilençio in memöia de Samuel Paty, e propòsto à tutti professoî de leze in classe a lettia de un poæ nòbile da scheua repubricaña, in sciô ròllo di meistri, pe pöi ravveddise e taggiâ boña parte da lettia, in virtù do prinçipio do “pöco casin”. Ve â chì a parte censurâ da lettia de Jean Jaures: “J’en veux mortellement à ce certificat d’études primaires qui exagère encore ce vice secret des programmes. Quel système déplorable nous avons en France avec ces examens à tous les degrés, qui suppriment l’initiative du Maître et aussi la bonne foi de l’enseignement, en sacrifiant la réalité à l’apparence! Mon inspection serait bientôt faite dans une école. Je ferai lire des écoliers, et c’est là-dessus seulement que je jugerais le Maître”.

Sta censura â dixe longa in sce un Ministero che o pâ o no veugge dâse o tempo pe formâ spiriti critichi, ma ciutòsto catalogâ de sprescia di studenti ancon zoeniscimi. Inti liçëi profescionali de periferia, comme o mæ, gh’é spaçio solo che pe creâ solo da man d’òpera zoena, pöco costosa e sorviatutto dòcile. E l’é chì che i conti no tornan e e questioin se esasperan, fin à arrivâ à l’abominio. In sciâ fin, inte sto menuto de scilençio, à livello naçionâ s’é verificou ciù de 400 (!) violaçioin oggetto de rappòrti interni: 160 caxi de refuo à parteçipâ ò perturbaçioin do menuto de scilençio; 150 caxi de apologia do terrorismo e ciù de 100 atri caxi gravi (minacce, vandalismo, provocaçioin de vario tipo) di quæ unna boña dozzeña oggetto de denonçia a-e autoritæ giudiçiäie. O modello “repubrican” d’integraçion soçiale pe mezo da scheua de l’òbrigo o l’é chì misso depoì a-o seu fallimento: a-i responsabili politichi, personale scolastico, insegnanti, genitoî, allevi e societæ civile tutta, l’òbrigo de rendise conto di seu mendi e rifondâ insemme unna scheua ciù giusta, incluxiva e meritocratica. In davei repubricaña.