A vegiaia e a pandemia

O dibattito spegou da-o tweet de Toti in scî ançien o s’ea averto in realtæ quarche settemaña avanti inte çerti paixi nòrdichi, e o no l’aiva avuo un gran riscontro da-e nòstre parte, à conferma do fæto che scin à quande o problema o no ne tocca da vexin no ô piggemmo in esamme, e sto chì o l’é za un segnale peigoso de sostançiale indifferensa. me treuvo donca à discutine con diverse persoñe, e me piaxe, pe introdue o tema, regordâ l’episòdio de l’Eneide, donde se leze che Enea o scappa da Tröia, portandose o vegio poæ Anchise in scê spalle e tegnindo pe man o figgeu Ascanio, accorzendose che a moggê Creusa a no gh’anava apreuvo. Squæxi subito vëgno interrompio da unna voxe ch’a sottoliniava o maschilismo da quella vixenda, e corpe de Enea pe-a perdia de Creusa e dapeu de l’abandon de Didon, e de atri moæ ancon. Oua, se capisce che s’é apreuvo à fuggî da unna çittæ inguggeita inte sciamme, con in scê spalle unna persoña ançiaña, che fòscia a no l’é in graddo de corrî, se tëgne un figgio pe man, che stante l’etæ o l’à da ëse conduto, anche pe-a responsabilitæ de accompagnâ un minô, e gh’é unna dònna grande ch’a se perde. O poeiva in davei enea strascinâse tutti trei? O poeiva fâ unna çernia differente? Inta mæxima scituaçion, ò inte unna pægia, ognun de niatri cöse o l’aviæ posciuo fâ? In mente torna e imagine de unna pellicola, La scelta di Sophie: unna moæ, davanti à un militare do campo de conçentramento, a deve çerne quæ di doî figgi sarvâ, immediatamente, da-a camia à gazzo. Çerne, inti momenti tremendi che a vitta a ne peu propoñe, a l’é unn’atrocitæ in ciù, escì ben che un o no peu sottrâse; e l’é, inte çerti momenti, ormai inutile domandâse comme se segge arrivæ à quelli ponti. A riflescion a saià ripropòsta a posteriori, pe exempio domandandose comme segge stæto poscibile arrivâ a-i campi de conçentramento, ciutòsto che racconâ i orroî consummæ inte quelli campi. Comme s’é arrivæ lì? Inte l’indifferensa; l’indifferensa de chi o no se sentiva coinvòlto da-i accadimenti, che, giorno dòppo giorno an conduto à quella tristiscima pagina de l’umanitæ. Indifferensa. Quande in quarchidun de quelli paixi nòrdichi s’é comensou à imaginâ l’exigensa de dovei çerne à chi spettesse pe primmo a cua into diffondise de l’epidemia, pöca discuscion a l’é vegnua apreuvo; i paixi nòrdichi in fondo son mai tanto lonten da niatri, geograficamente, colturalmente... Ma tòsto che o problema o s’é desteiso comme unn’ombra longa vexin à niatri, tutti pronti à criâ, à criâ contra un barbaccìo, ognun pronto à diciarâ o valô di ançien, ma unn’analixi sòccio-politica a latita ancon; se comensa pe esaminâ o peiso politico de unna çernia, ch’a scignifica tante atre, comme à indicou Borzani, ma nisciun che o s’incalle à dî in davei cöse se porià fâ se e çernie no se porrian pöcassæ ciù sghindâ. Se se leze o succedise da vixenda de Enea, se imprende che quande lê o s’accòrze che a moggê a no ghe va apreuvo, o torna in derê à çercâla, e coscì a ne mostra che de vòtte primma de comensâ à trovâ o “ma e o se”, saieiva megio fermâse à leze scin in fondo e à riflette. Sophie à sacrifica a figgia in sce l’artâ de çernie sconscideræ da seu famiggia, e de tante atre famigge de tradiçion ebraica, ch’ean restæ scilenti depoì a-a progresciva affermaçion do nazismo, se no fiña compiaxenti, into timô de perde sorviatutto i vantaggi soçiali di quæ gödivan. Ma avieivan posciuo fâ diversamente? Scilente indifferensa, che à tutti i mòddi a l’é stæta unna çernia. No çerne quande s’é in tempo, no piggiâ poxiçion, no schierâse, perdise inte l’indifferensa o peu fâne trovâ depoì à de çernie dolorose, che no se peuan sghindâ. A democraçia a vive in sciâ poscibilitæ de çerne, ma ascì a dittatua a se afferma in scê çernie mancæ de unna scilente, indifferente maggioransa.