E eleçioin in USA
Unna partia averta ancon pe un pö

Ma chi o l’à guägno e eleçioin inti USA? A no l’é unna domanda retòrica. Da giorni se conta i voti che deciddian chi saià o quarantaseieximo prescidente american, e l’é pròpio da quelli voti che pâ che dipendian e sòrte do pròscimo prescidente, e de cause legali che i avvocati de Trump an za depoxitou inte diversci stati de l’Union. O problema o sta into fæto che, ësendo i USA un paise federale, l’amministraçion do voto a l’é lasciâ inte man di scingoli stati, resultando inte un scistema eterogeneo e caòtico. Inte çerti stati, comme o Texas, son validi, e donca contan a-i fin elettorali, solo i voti mandæ pe pòsta no dòppo i 3 de novembre, e riçevui da l’amministraçion avanti do 4; inte di atri stati, comme o Nevada, van ben tutte e schede riçevue avanti do 10. No cangia solo de stato in stato o mòddo de contâ i voti, ma ascì o scistema de richiesta da scheda elettorale, e de verifica de l’identitæ do votante. Gh’é di stati, comme l’Alabama, che pe votâ ghe veu un documento de identitæ offiçiâ, e di atri, comme a Califòrnia, donde basta unna preuva de rexidensa, tipo unna semplice bolletta da luxe. L’é di meixi che l’amministraçion Trump a s’allamenta de l’eterogeneitæ do scistema de voto pe pòsta e a l’accusa i democratichi de voei architettâ un sfrouxo elettorale. E poxiçioin di doî partii in sciô voto postale son de fæ oppòste areo. I repubrichen an conseggiou a-i seu elettoî de votâ de persoña o giorno de eleçioin, perché sta tipologia de voto a se presta meno à di potençiali manezzi elettorali; i democratichi incangio an suggerio de votâ pe pòsta, perché o l’é un mòddo ciù flescibile con i oräi de travaggio e ciù seguo in termini de salute, evitando assembramenti e rischi de contaggio Covid. Se conscideremmo ste doe distinte reccommandaçioin de voto, l’é assæ probabile che ciù voti postale se contan e ciù Biden o l’é destinou à guägnâ. L’urtima paròlla, à tutti i mòddi, ghe l’avià probabilmente a Corte Supremma (donde i giudiçi son in maggioransa conservatoî), ch’a dovià deçidde in merito a-e accuse de sfrouxo elettorale mesciæ da-o Partio Repubrican contra i democratichi. Trump into 2016 o l’aiva guägno ascì graçie a-o voto da classe operäia do “Rust Belt”, a region do nordest di Stati Unii, che a l’à patio un declin industriale à partî da-o anni ’80, dovuo in boña parte a-i accòrdi di libero scangio che an transferio a produçion industriale automobilistica e de l’äsâ in Asia e in America Latiña. Con tutto che o Trump o segge riescio à rinegoçiâ diversci accòrdi inti urtimi anni, compreiso o NAFTA co-o Mescico e o Canada, a crixi COVID a l’à stroncou l’economia e quelli voti no son ciù tornæ. Doî caxi exemplari de sta dinamica son o Michigan e a Pennsylvania, che do 2016 diventan repubrichen e oua son tornæ à ëse democratichi, pe un scarto de solo un pâ de ponti perçentuali, ma quante basta pe dâ à Biden i 36 voti decixivi into conseggio elettorale. Dòppo meixi de lockdown e de proteste do movimento Black Lives Matter, l’economia e a tegnua soçiale do paise an sofferto de brutto. O Partio Democratico o l’é riescio de seguo à catalizzâ o voto de minoranse etniche e LGBTQ. Resta à tutti i mòddi da capî quæ saian e reali propòste democratiche in campo econòmico e pe-e politiche in scî diritti soçiali, tutti temi in scî quæ Biden o no s’é mai sbilanciou in campagna elettorale. O resultato de ste eleçioin o vegnià probabilmente deciso da un tribunâ. Biden o riescià probabilmente à vinçe, ma o futuo di Stati Unii e de classe soçiale ciù vulnerabile o l’arresta à tutti i mòddi inçerto fòrte.