“Arcipelago”

Ghe voeiva unna pandemia pe dâ un sponcion à di raxonamenti antighi, che interessan a riçerca urbanistica da do bello. Da Rem Koolhas, à Stefano Boeri, à Andrea Boschetti, da un muggio de anni arriva di grendi sponti pe ripensâ e çittæ e i nòstri mòddi de abitâ, che za da tempo no son ciù ammiscibili pe sostegnî a lòtta contra e disegualianse, pe fâ fronte a-e devastaçioin ambientali, pe risponde à di mòddi neuvi de travaggiâ, smart e no smart, e a-a vitta pandemica, o nòstro neuvo indicatô de progetto anche quande sta tragedia a vegnià superâ. son quelli concetti che ancheu reciòccan in scî giornali no solo de settô, saiva à dî “a çittæ arcipelago de borghi”, ò quello de “çittæ in 15 menuti”, o manifesto da Pariggi de M.me Hidalgo.

O modello da çittæ fonçionalista, progettâ pe grendi zöne e grendi aggregatoî, o l’aiva za esalou l’urtimo respio tanti anni fa. Ma i architetti e i urbanisti no servan quande s’à do tempo pe progettâ; î tiemmo in ballo solo quande o daddo o l’é asbriou, e i ponti son cheiti. Sto chì pâ che vagghe ben à tutti, coscì se spende pöco, e intanto l’importante o l’é “fâ quarcösa”: tappâ quelli beuggi inte l’immediou, fâ di belli giardinetti anni ‘80 co-i fiori de veddro che scancellan o degraddo, ascordandose che magara gh’é o spaçio pe un tram, unna ciclabile, insomma quelli raxonamenti che solo un studdio approfondio da seçion straddale, ch’o mettesse insemme diversci ingredienti che anessan ciù in là da vista da-o barcon de l’amiga da seu, o l’aviæ posciuo mette in evidensa. Ghe veu do tempo, se capisce, ma i çittadin e de conseguensa i seu rapprensentanti an beseugno da çittæ prêt à porter. E pensâ che un erboo o ghe mette 25 anni à cresce. Con questo no veuggio levâ a paròlla a-o çittadin, che o diventa parte attiva inta progettaçion de çittæ, ma vorriæ sottoliniâ che a parteçipaçion a no veu dî dâ in man un feuggio gianco a-o vexin de casa: a l’é ascolto, a l’é recuggeita de beseugni e de sponti, a l’é discuscion in çimma à di grendi obiettivi, ma a scintexi tra tutte e parte a dev’ëse fæta pe fòrsa da chi o gh’à e competense e sorviatutto da chi o l’é ciammou à avei a responsabilitæ da rispòsta progettuale. L’ascolto o l’é a premissa de ògni progetto, no o fin. A rispòsta a-i beseugni a l’à un atto de responsabilitæ, e sto chì o vâ no solo pe-a progettaçion urbanistica, o vâ ascì pe-a politica. Construî unna çittæ a l’é unna cösa pe-i secoli, rimodellâ un paisaggio o va ben ciù in là do tempo de un tweet, de un ciclo amministrativo, do favô che se deve à l’amigo e do tempo into quæ ognun de niatri o vivià.

Me ven da rie à rilezime quande do 2017, inte un invexendo politico pe-e eleçioin communale de Zena, aivo pensou de calummâ o concetto de “arcipelago” inta mæ çittæ. Me paiva unna cösa naturale quello cian de governo “Arcipelago Genova: una federazione di città nella città”: l’ea giusto a çittæ in 15 menuti hidalghiaña, o a vixon boeriaña de arcipelago. ninte de particolarmente innovativo pe-i addetti a-i travaggi, ninte de strafaläio sorviatutto pe Zena, che morfologicamente a ciamma quello modello; solo unn’evoluçion neçessäia pe no trovâse un doman con un muggio de problemi da risòlve in mòddo emergençiale. O l’ea un concetto urbanistico portou inte unna campagna politica, ma do resto a politica a se òccupa da vitta presente e futua, e donca a deve preoccupâse de creâ e condiçioin neçessäie perché inti spaçi, segge urben, segge rurali ò monten, se realizze un mòddo equo, sostegnibile, democratico e etico de abitâ.

A politica a deve occupâse do spaçio, perché l’é lì che vivemmo. Manco da dî, no n’an votou. E tanto che à Milan se realizza l’arcipelago e Armani o cianta de foreste, continuemmo pure à indignâse pe-i barbaccii di fantomàtichi cultural manager e pe-e call for ideas pe di travaggi profescionali rigorosamente de badda. A-a fin o post-it in sciô frigo “domani mi metto a dieta” o va ben à fianco de quello “domani progetto il futuro”. Ghe saià delongo un doman.