Unna neuva politica pe tiâ sciù di ponti

A vittöia de Biden a lascia un quaddro in ciæo e scuo. Settanta milioin de americhen, circoncirca, an votou pe Trump, e se se va à vedde e cartiñe da distribuçion di voti se treuva quello che da un pö de anni in sà se screuve à ògni eleçion: e çittæ e e zöne ciù sviluppæ (e ricche) scrivan “progrescista”, tanto che e periferie, e arie rurali, e zöne depresse e pöco popolæ çernan o populismo de drita, inte tutte e seu sfummatue (no existe, inte sto momento, unna drita liberale ò conservatoa, no populista). Succede coscì in Fransa, in Italia, in Gran Bretagna; succede coscì à grande scaa tra i stati europëi, donde quelli ciù marginali (Ungheria, Polònia, Slovenia) son passæ a-i populisti, tanto che i atri – ò ben ò mâ – rexistan. Succede pægio, into nòstro piccin, anche in Liguria, donde se vota PD e scinistre into çentro stòrico de Zena e inti quartê ciù ricchi, ma inta provinsa de Imperia Toti o l’arriva a-o 65%.

Se trovemmo coscì inte sta scituaçion che e fòrse progresciste guägnan con l’arrembo de quelli che no saieivan i seu votanti naturali, e che se capisce che no son pronti à portâ avanti ciù che tanto di progetti de riforma soçiale e econòmica a-o de feua do status quo, co-o resultato che e scinistre diventan de facto o guardian de un scistema evidentemente ingiusto e peigoso. Pe questo an finio pe ëse odiæ da-e parte da popolaçion ciù svantaggiæ, e no sensa raxon. Ma ancon ciù grave o l’è o fæto che, taggiando geograficamente a popolaçion elettorale inte sto mòddo, se renonçia definitivamente à propoñe un discorso che o parle idealmente à tutti i urtimi, cösa ch’a l’è conträia à l’intendimento originäio de ògni progrescismo.

Se discorriva assæ inti primmi anni doamia do “secolo de çittæ” che o stava comensando, do ròllo de çittæ comme çentro de modernizzaçion, de evoluçion, eccetera. Son raxonamenti vëi, ma incompleti, e in fin di conti snobisti e escludenti. Solo unna grandiscima barlugheuia a l’à posciuo portâ e scinistre à sposâ sta vixon, e à informâ o seu discorso generale à l’esaltaçion do ròllo di contesti urben, evolui e moderni, comme fïsan e ponte de lansa de neuve societæ che voemmo construî: ciù giuste, attente à l’ambiente, consapevoli. Invexendandose pe un “bòsco verticale”, un òrto urban, unna “speisa de proscimitæ da produttoî ecològichi”, e ascordandose areo di bòschi vëi, di òrti vëi, di çittadin che stan a-o de feua da bolla, e che o ciù de vòtte no son produttoî ecològichi, ma un quarcösa de meno cool, sciben che ciù reale. Ascordandosene in primmo leugo à livello de discorso, de empatia, de incluxon emoçionâ e de rappresentaçion collettiva. L’è in sce questo terren che à construio e seu vittöie o fronte da drita sovran-populista.

A l’è unn’inluxon quella de pensâ che, cian cianin, tutti i territöi evolvian verso e forme che piggian còrpo inti çentri; a teoria econòmica a mostra o conträio. L’è da-i anni ‘50, da quande Raul Prebisch o l’à misso in luxe co-o “modello çentro-periferia”, che se sa che into momento into quæ se instaura unna dinamica ch’a vedde un territöio marignalizzou (periferia) dipende da un atro (çentro), a disparitæ a continua à cresce se no se prevedde un intervento strutturale esterno. Pe questo s’ea provou, inti anni da soçialdemocraçia, à sponciâ un modello de sviluppo poliçentrico, do quæ l’Italia a l’ea un exempio ciutòsto riescio. Ma da venti, trent’anni in sà, co-a globalizzaçion, sto processo o s’è invertio. E a question a l’è che a perfierizzaçion à l’è derê a-o canto pe un muggio de territöi, anche urben, che fin à vëi stavan a-o çentro do parcoscenico. In prospettiva, saian delongo de meno e arie “çentrali”, e tantiscime e periferie, ciù ò meno intensamente caratterizzæ. I resultati elettorali vegnan de conseguensa. Zena e a Liguria, inte sto senso son za belle che avanti e saiva ben rendisene conto.

L’è pe questo che se rende sempre ciù urgente un discorso che o segge a-o mæximo tempo progrescista e territorialista; che o parle a-i territöi, che o ghe dagghe importansa, autonomia, che o l’includde inte grendi çernie, comme oua quelle relative a-o processo de riconstruçion econòmica e soçiale post-Covid. Attardandose inte unna vixon ch’a veu a dimenscion statale comme a sola poscibile pe inandiâ di procesci importanti, donde se zeuga in davei – inte unna meña de tirannide do status quo – e fòrse progresciste limitan a portâ do seu messaggio, za debole, e lastregan a stradda do seu tramonto. A mæxima pandemia, incangio de ëse vista comme unna poscibilitæ de inandiâ un percorso neuvo, a l’è stæta giâ de mòddo da rafforsâ o ròllo do Stato à danno di territöi. In sce questo drita e scinistre se treuvan d’acòrdio, e l’uniformitæ de pensceo a l’è mai tanta che no s’è sentio dî squæxi da nisciun che no gh’è de sæximo into prevedde e mæxime nòrme restrittive da libertæ e di spostamenti inte unna grande çittæ ò inte un paise da trexento abitanti. No gh’intra a difficoltæ de applicaçion: a l’è unna question de forma mentis. Che emmo da cangiâ perché a no ne pòrta ben.