Zena 2004-2020
Ritorno in çittæ

Zena a m’appartëgne. Ò, a-o manco, l’ò sempre pensou. Sorviatutto inti momenti inti quæ do vive à Romma no riescio à vegnîne à cappo.

Son arrivou in Italia che l’é sezze anni, into frevâ do 2004. À Zena, scì. Ançi, in salita di Santa Brigida, civico 8, pe ëse precisi. O 30 de settembre de inguanno, st’anno chì strafaläio, son tornou in çittæ. Un incarrego inta sede de Architettua, de Straddon Sant’Agostin, a l’é a caxon de sto ritorno. E t’ê me chì torna.

Chiño da-o tren, Staçion Prinçipe, Stradda Balbi, me gio un momento e piggio unna föto de l’erco de Brigida. Monto un momento, convinto de trovâ dötræ sciringhe pe tæra. Ninte. Tutto o l’à l’äia de netto e ordinou. Beh! Me affaccio zu in scî treuggi, avvoxæ treuggi de Santa Brigida. Son attirou da-e scrite in pseudo-neon-tubetto de Natale in plastica-abbiguelou che indican quarcösa. Me astissiscio un pittin, e no ammio manco quello che dixan. Quante ean belli quelli neon che inluminavan à malædi Stradda Balbi a primma vótta che ò misso pê à Zena, penso. In sciô fâ da seia, tanto che tornavo à casa da-o travaggio che favo à quelli tempi, passavo e oe à ammiâli. E pövee lampade de l’inluminaçion no riescivan à fâghe concorrensa. No, scinché a “capitalitæ” da coltua a no l’é sätâ da-a nòstra parte, a no l’é arrivâ a-o nòstro sestê ascì. Da-o repiggio di palaçi di “Ròlli” ean passæ à mette “in bella” i spaçi di zoeni universcitäi. “E luce fu!”. Unna pesante lengua de luxe gianca a t’accuggeiva za a-o rientro di carroggi, da Ciassa da Nonçiâ. Figuæve comme s’ean stranii i eroinòmani. Dio o salve a gentrificaçion!!! Perché à niatri o n’à mai domandou o nòstro parei. Tant pis, comme dieiva i franseixi. Defæti a vitta a no l’ea solo Stradda Balbi. A vitta a l’ea o pesto e o menestron de Maria, a capoeira in Ciassa da Levre, i conçerti jazz do lunesdì, quelli in giorni abrettio à La Madeleine, a torta pasqualiña da-o forno a-o canto de via Lomellin, e jam sessions e e nottæ scin à l’arba a-o Nick Masaniello, a vinassa do Moretti, e ancioe frite de Sottoria, i balli a-o Qualude ò a-o Milk... e quella vista in sciô pòrto antigo, in sciâ lanterna, da quelli barcoin stramesuæ da casa de Brigida. L’é stranio ritornâghe, apreuvo à tutti sti anni, no pòsso denegâlo. Ò visciuo into frattempo à Romma, Berlin, Milan, Kinshasa, Port au Prince, La Paz. E, paradossamente, aspëtavo che ninte se fïse mesciou de unna virgola. Avendo stavòtta base in Ciassa Banchi.

I carroggi incangio son megioæ ben ben. Da quande son tornou no ò ancon visto nisciun ratto gigante, atri grendi protagonisti da mæ primma esperiensa zeneise. Saian stæti sterminæ da-i accòliti de Airbnb? Veddo gente de colô. De tanti coloî, in realtæ. Me piggia ben sto spirito “portuale”. À mi che son un paisanòtto spagnòllo, me demoa vedde tutta st’eterogeneitæ. Tutto sto spettro coscì ancio de naçionalitæ. Dònne e òmmi vegnui da-i pòsti ciù disparæ do mondo, treuvan chì un seu spaçio. Ò a-o manco coscì pâ. Tornando à Via de Pré, confermo sta sensaçion. A stradda a l’é delongo stæta streita. Figuæve ancheu, in tempi de epidemia. Ma a no perde mai a seu diverscitæ.

Me domando comme fan à rexiste quelle buteghe, tutte locali, e penso de anâghelo à domandâ. Ma pöi m’affermo. No dovieiva ëse questa a normalitæ? Me manca però a muxica. Ò delongo pensou che à Zena gh’ea un muggio de muxicisti. M’arregòrdo do 2004, de sentî e vedde sunnâ tante zoene e zoeni. Domando in gio. A-o de là do virus, che o l’à finio de dâ a massâ à un panoramma muxicale e colturale za assæ mâ piggiou, inte sti anni in tutta Italia, nisciun me sa dî ninte. Levou, “no sò, ma no gh’é ciù tanti conçerti comme gh’ea primma”. Comme mai? Me domando. No veuggio vedde e ægue tròppo brutte. Coscì son tornou à Romma un pâ de settemañe. Doman però monto torna, con l’idea de anâ à çercâ quella muxicalitæ che sta çittæ a l’à sempre avuo, e no l’é poscibile che a l’agge perso.