A çittæ ch’a no l’à ciù de vixon

A primma vòtta che son anæto à Zena l’ea o 1985, pe frequentâ o liceo artistico Santa Dorotea into quartê borgheise de Arbâ. Vegnivo da-a periferia, Busalla, un tempo definia a “picciña Svissera”, pòsto de villezzo di zeneixi, conosciua ascì pe-a presensa da raffineria. Zena a l’é a çittæ inta quæ son nasciuo into 1972, ma che ò visciuo, conosciuo e ammou da studente de liceo, de universcitæ, e dapeu da profescionista da fotografia e da produçion de progetti colturali. A Zena da mæ adolescensa a l’ea quella de partie à ballon co-i odiæ studenti de Marçelliñe, de oe à disegnâ da-o veo e à plasmâ e scoltue in plastiliña, e pöi di viægi in treno scin à casa. Into periodo universcitäio a çittæ a l’ea quella da parteçipaçion a-i workshop, e a-i disnæ a-e “Tre Finestre” in Sarzan. O quartê donde streuppe de studenti affollavan e aule da Facortæ de Architettua, progettâ da Ignazio Gardella e vosciua fortemente da-o teòlogo e prescide Edoardo Banvenuto: o primmo scignificativo recupero do çentro stòrico. Exito de un progetto politico primma e architettònico pöi, tròppo spesso ascordou. O pòrto o l’ea in fermento tanto che mi da quarche anno aivo comensou à fotografâ l’architettua.

Coscì me son trovou into 1992 à contâ o cantê de l’Expo pe un libbro (mai pubricou) de Ermanno Ranzani, un professô ammou e odiou, ma appascionou, pròpio in scê colombiadi. Quello che m’aiva corpio l’ea a Ciassa de Feste che aiva progettou Renzo Piano e Peter Rice. Un spaçio veuo in sciô mâ donde anavimo à disnâ co-a fugassa e o panetto do “Bettolin” de Sottoria, unna fruiçion che ancheu a no se peu imaginâ, co-a transformaçion unna vòtta pe fâ o Suq, unna vòtta pe pattinâ, unna vòtta pe restâ inaccescibile a-o seu ëse spaçio pubrico. ma a çittæ a l’ea ancon piña de fermento. Bastava mesciâse inte aule de Architettua a-e conferense che Enrico Bona, architetto e professô, organizzava co-i protagonisti de l’architettua internaçionâ: da Lucien Kroll a-i Atelier 5, scin à Giancarlo De Carlo, ch’o tegniva o corso de compoxiçion architettònica. E ancon a formaçion de gruppi e collettivi comme i A 12 (Gallanti, Bruzzese, De Ferrari, Balestrero, Barreca, Marchica) e o seu stanson, è e Actiegroep (Grigoli, Lazzeri, Merlo, Sponza), i incontri “Non luoghi spazi allotropi” a-o Paxo organizzæ da Brunetto De Batté. Occaxoin de confronto e de imprendimento che an formou tanti zoeni. E ancon, a çittæ di tiatri, do Teatro della Tosse, co-e intuiçioin de Tonino Conte e Lele Luzzati inte l’occupaçion di spaçi abandonæ, comme e officiñe Ansaldo à San Pê d’Æña pe allestî “I persiani alla Fiumara”. Sperimentaçioin che inti anni son ammermæ scin à l’afaxia attuale, con unna çittæ ch’a rantega e a se rebella tra idee che san de stallio e grendi potençialitæ. E dapeu e grendi promisse, no mantegnue: e periferie. Quande paiva che a politica a voesse ammiâ a-i bòrdi da çittæ, e incangio a l’ea solo demagogia. Regòrdo o “Pic-nic al Biscione” che aivo organizzou con Andrea Botto, co-i scimbolo “Biscione 04” pe piggiâ in gio o lögo offiçiâ da çittæ europea da coltua, pe rimarcâ che o Biscion, cappolavoro de l’architettua fæto da Luigi Carlo Daneri, o fïse çittæ comme chesesegge atra parte de Zena. Tante, tròppe paròlle in sciâ periferia pe no risòlve ninte, anche da parte de chi gh’ea ciù cao a narraçion romantica a-a soluçion di desaxi soçiali, pe pöi anâ à dirizze o çentro de produçion colturale çittadin. Sto chì o l’é delongo stæto o problema de Zena, e tròppe paròlle pe giustificâ di atteggiamenti equivocæ, che an amplificou i problemi, a-a base di quæ gh’é delongo stæto, vëi comme ancheu, tròppa tanta ideologia: into passou l’ea a scinistra, ancheu l’é a lega. Inti urtimi dex’anni a çittæ a l’à perso a buscioa, mettendo in evidensa quanto a crixi a segge profonda e scistemica, inta coscì dita classe dirigente e politica pöco averta à l’innovaçion. Do resto, i zoeni ascì son za vegi, inti comportamenti, into mòddo into quæ vestan e agiscian, veo e pròpio termòmetro de un declin a-o quæ a politica de maggioransa e oppoxiçion a no sa dâ recatto. Cöse manca, donca? Manca un progetto, manca e idee, no e ideoñe che Iron Man/Tony Stark (alias Marco Bucci) o sforna à ritmo continuo. Da-a gabinovia à l’azzeramento di muniçipi, pe riportâne in derê a-a Grande Zena de mussoliniaña memöia, scin a-a pista ciclabile de Corso Italia neuva verscion (3/4 de marciapê pista, 1/4 de marciapê pe-i pedoin), a-a rimoçion da nòstra stöia co-a destruçion di musei progettæ da Franco Albini into dòppoguæra (Palaçio Rosso e Sant’Agostin), pe-o finî co-o mirabolante “Museo della Città”.

Zena, çittæ anestetizzâ da-i siero iniettou da Iron Man, indifferente à chesesegge fæto se no pe quelli atti demagògichi da politicamente corretto, comme se a rimoçion da nòstra stöia e di nòstri diritti no fïsan mai tanti primmäi, maniman... Good luck Zena!