A neuva diga foranea a no l’è un ponto d’arrivo ma a partensa do sviluppo

Beseugna dâ a mente à chi crea benefiçi o sviluppo perché gh’é o rischio che vaggan inte stacche solo che de çerte categorie. E che no se cree o travaggio.

Dòppo tanti anni finarmente se procede co-a progettaçion da neuva diga foranea. À distansa de 145 anni da quande o Ducca De Ferræ o l’à misso à dispoxiçion 20 milioin de lie pe protezze e rilanciâ o pòrto de Zena, e à 26 da-a riforma di enti portuali do 1994, semmo torna davanti à unn’occaxon stòrica de repiggio inte l’attivitæ econòmica a ciù importante da çittæ e da region. Graçie ascì a-i fondi europëi do Recovery Fund (500 milioin in sce a-o manco 1.000 de costo), saià donca poscibile allontanâ de çentanæa de metri a diga, in particolâ rispeto a-a zöna de San Pê d’Æña, donde no l’é guæi che l’é stæto inaugurou o terminal container Bettolo, assegnou in concescion à MSC fin a-o 2045, za costou 250 milioin e restou fermo pe di anni.

Un deluvio de dinæ pubrichi, che de seguo portian grande benefiçio à chi gestisce o trafego di container de quelli terminal e à chi ghe fornisce i serviçi accessöi. Ma perché sto sviluppo econòmico o se transforme inte un progresso soçiale diffuso no dovemmo vedde o spostamento da diga comme un ponto d’arrivo, ma comme un ponto de partensa de un aggiornamento do disegno e de capaçitæ do pòrto e do seu rappòrto co-a çittæ.

Comme o l’à sottoliniou giustamente o zeneise Mario Sommariva inta seu primma intervista da neo-prescidente do pòrto da Spezza, “l’unità di misura del rendimento di un porto non sono le tonnellate di merci, ma i posti di lavoro che genera”. O spostamento da diga però o l’é à benefiçio solo che de un segmento do pòrto, i terminal container de San Pê d’Æña, che an un rappòrto de addetti pe metro quaddro inferiô à peto de atre attivitæ comme a navalmeccanica, ch’a ghe n’à træ vòtte tanto. De fæti, con tutto che o trafego via container o segge l’unico che o l’é cresciuo insemme a-i passaggê dòppo a crixi econòmica, questo o no l’à megioou l’occupaçion into pòrto de Zena, che a l’é cresciua solo de l’1% in 13 anni. In ciù, o futuo do pòrto commerciale o l’é delongo de ciù conçentrou inte man de pöchi, segge da-o lato di lavoratoî, donde l’occupaçion a l’é sempre ciù precäia, segge da-o lato de impreise, donde i imprenditoî locali an ormai venduo e seu concescioin a-e multinaçionæ da logistica. O pòrto o resta formalmente de tutti, ma i affari vëi son stæti quelli di privæ con costi pubrichi. A ministra di transpòrti a l’à de fæti promisso de mette i dinæ che manca rispeto a-i fondi europëi, pe completâ l’òpera. L’investimento do stato o resta donca nettamente prevalente. Anche i effetti in sce l’induto son sempre ciù acçentræ e basæ in sciâ rendia. O studdio de impatto econòmico fæto da-a AdSP o rileva che a filiera portuale a genera o 10,8% do valô azzonto regionâ, ma solo l’8,3% de l’occupaçion; de sto valô azzonto o 60,9% o resta à l’interno de attivitæ portuali e subito derê o settô ch’o ne trae maggiô vantaggio o l’é quello imobiliare, con o 9,6%, tanto che e attivitæ profescionali ne ottëgnan solo che l’1,2%.

Zena a pâ donca destinâ à unn’economia do post-travaggio, divisa sempre de ciù tra i rentier e i suscidiæ, divixon no solo econòmica, ma anche geografica vista a netta distinçion tra un Ponente postindustriale e à serviçio da logistica, e un Levante à vocaçion turistica e rescidençiale. insomma, questa acceleraçion spedia do capitalismo tecnològico, incangio che a-o soçialismo, a l’é apreuvo à portâne verso unna meña de neofeudaleximo. Escì ben che o travaggio o no l’é finio: con arsâ o sguardo a-a dimenscion globâ o numero de colletti bleu e gianchi o l’é in crescio constante, semplicemente no chì.

Aloa, tornando a-a diga e sciortindo da-a lògica picciña de anâ apreuvo solo o container doviëscimo riflette in scê tante opportunitæ conlaterale che peuan derivâ da sto sfòrso de inzegneria e de dinâ: se pense pe exempio à l’opportunitæ de generâ energia rinnovabile, co-o möto ondoso, e con l’eòlico, a-a poscibilitæ de sponciâ o pòrto verso o mâ e liberâ, ò a-o manco scistemâ torna quelle äie de confin sofferte, comme longomâ Canepa e i depòxiti de Mortiou, a-a neçescitæ urgente de ammodernâ i spaçi ILVA garantindo a mascima operativitæ à l’acciaieria, ma trovando de neuve scinergie, comme l’é stæto pe-e turbiñe de Ansaldo Energia, e çercâ de trovâ ciufito che se peu unna zöna, anche feua da-a region, pe organizzâ un retropòrto efficientemente collegou, à l’opportunitæ de destinâ parte di ritorni derivanti da-o crescio do commercio verso i territöi ciù corpii da-e servitù industriale pe rendili torna vivibili. Che a diga a segge donca un ponto de partensa, no de arrivo.

Federico Martinoli