A politica into carrello

Esselunga a l’arriva à Zena. Tripudio da unna parte, sensaçion da provocaçion da l’atra. In atteisa de trovâ unna poxitua normale.

O recente esòrdio da cadeña de supermercoei Esselunga in sciô seu zeneise o l’é stæto saluou con un sciato, un battage rumoroso da parte da maggioransa politica de çentrodrita ch’a governa segge o Commune de Zena, segge a Region Liguria. Pe quante de sti tempi ògni attivitæ imprenditoiale che a l’agge l’ardî de mette pê inte sta çittæ a segge da accheugge con favô e sciña con ammiraçion, a raxon de un invexendo coscì sfrenou a l’é da recondue à l’eròica rottua de un presunto monopòlio da Coop inte l’ambito da grande distribuçion sotta a-a Lanterna.

L’é probabile che a Coop a l’agge gödio à Zena de un contesto politicamente favorevole, ma a-o pòsto de unna partigianeria de segno oppòsto, saieiva da augurâse un ritorno à l’imparçialitæ da parte da pubrica amministraçion. Sorviatutto, però, saieiva opportun osservâ a vicenda con un sguardo attento a-a salute no solo do portafeuggio, do resto importante, di scingoli çittadin – che fòscia avian di benefiçi, un quarche risparmio piccin – ma anche da polis into seu complesso. O commercio o constituisce unna de raxoin pe-e quæ i ëse umen an piggiou à arrecampâse inte di insediamenti de maniman ciù scciassi, ciù densci; scin da-e origini e modalitæ e i spaçi construii inti quaæ questo o vëgne esercitou inciddan in scî equilibri da societæ, oltre che in sciô sviluppo de l’urbe, saiva à dî da çittæ in senso fixico.

Inte sta prospettiva, un pittin ciù larga de quella offerta da-o scangio de despeti tra de façioin avverse, o sciallo exibio da-o çentrodrita ligure o pâ a-o manco strafaläio. O corresponde scì à unna vittöia, ma a guæra in question a no l’é quella tra i doî giganti antagonisti, ma quella tra a grande distribuçion into seu insemme e o tesciuo commerciale tradiçionâ; unna guæra che a l’à za devastou a nòstra çittæ in termini de (in)sostegnibilitæ ambientale, de alienaçion de un grande numero de individui pe-i quæ i çentri commerciali an finio pe rappresentâ l’unica forma de spaçio pubrico e de tempo libero, e de perdia sensa mendo de quella ricchessa, colturale e soçiale avanti che commerciale, constituia da-e bitteghe de stradda e da-i mercoei de quartê; unna guæra che, pe di fattoî che unn’amministraçion a no peu controllâ, ma anche pe-a responsabilitæ specifica de chi o l’à governou o territöio zeneise – drita e scinistra sensa tante differense – a grande distribuçion a l’à za sostançialmente vinto.

Sorviatutto però, a “preisa de Zena”, da parte de Esselunga a pâ ormai unna battaggia de retroguardia: dòppo avei fæto tæra (urbaña) bruxâ, i supermercoei (no) leughi pe eccellensa, ma a-o manco ancon dottæ de unna precisa localizzaçion fixica, pan ormai lilì pe ëse collæ da un mostro ubiquo e sensa ligammi co-o territöio, rappresentou da-a combinaçion tra logistica integrâ e distribuçion à domiçilio, che do resto a l’à træto partio da-o diffondise de de neuve abitudini de vitta, caxonæ da pandemia in corso. Se i supermercoei oua assomeggian à di SUV rumoroxi e ingombranti, doman rischian de transformâse inte de carcasse ruzzenente e ätretanto ingombranti.

À Zena, tanto che tutti deuvian Spotify, festezzemmo perché sotta l’erboo de Natale emmo trovou l’Ipod; no saieiva incangio o caxo de corrî into soieu à levâ a pua da-i vinili?

Antonio Lavarello