A primma nasciua
L’urtima in diritti
O neuvo anno da politica locale o s’é averto inta direçion do sòlito opportunismo populista, ma con unna novitæ. À Cappodanno o team ch’o gestisce a pagina do Prescidente da Region Liguria o deve avei riçevuo de instruçioin pe anâ avanti co-a lenta ma inesorabile campagna de communicaçion pe blandî l’elettorou moderou a-o quæ oua “Cambiamo – Con Toti” o deve avei ritegnuo utile rivòlzise. Comme? Con un post co-o quæ o Prescidente o mostra de congratulâse à nomme de tutta a Liguria co-a primma nasciua de l’anno, ritræta a-o San Martin inte unna föto in brasso à seu moæ, che a l’osserva con un euggio asbasciou verso de lê co-a dôçessa degna de unna Vergine do Parmigianin. Peccou solo che se tratte de unna dònna de origine africaña, e fra i commenti scceuppa o finimondo.
L’elettorou da coaliçion de Giovanni Toti o no gradisce e partan e invettive razziste, nauseæ à l’idea che o seu Prescidente o pòsse consciderâ ligure ò italiaña a figgeua da nascion da-a pelle scua. A reaçion di responsabili da pagina a l’é immediâ e perentöia: i commenti razzisti saian scancellæ à l’inno de “chi nasce in Liguria o l’é ligure!”
O post o fa do sciato, e primma ancon che o giornalismo de 20.00 o passe a notiçia à tutta Italia, carcando in sce l’indignaçion pe-i cöri razzisti contra Toti, divegnuo martin Luther King pe un giorno, o cappogruppo da Lega in Conseggio Regionâ, sciô mai, o prorompe con un communicou urgente: a Lega a piggia e distanse da-e paròlle de Toti e a l’assegua o seu elettorou, chinnandolo co-a continua ninna-nanna do “vegnî primma di atri”; a melodia stavòtta e seunna che “non si può definire italiano, né ligure, chi nasce sul nostro territorio da genitori stranieri”, pe concluddise co-o stentoreo: “NO allo Ius soli” (con quello raffinou “NO” scrito in maiuscolo). Et voilà, o quaddro o l’é completo. Ne sciòrte un Prescidente da l’imagine antirazzista e incluxiva, e unna Lega ch’a l’avvarda a seu affascinante allure xenòfoba, e tutto o peu anâ avanti indisturbou comme o seunno de un figgeu da nascion. A veitæ a l’é che stavòtta ascì, comme da diversci anni in sà, nisciun o l’à fæto ninte pe nisciun, levou pe-a politica, che graçie à l’ennexima polemica a l’à incangio alimentou lê mæxima e con successo, inte unna finçion corale de interesse a-o debà in sce l’urtimo tema etico çernuo pe quello giorno.
In realtæ inte tutto questo l’unica cösa da quæ in davei no impòrta ninte à nisciun son i diritti da picciña Greta. Saieiva stæto bello addesciâse into 2021 e vedde proclammâ l’iniçio da battaggia pe-o ius soli, e incangio no. S’en contentæ de enonçiâ unna meña de baifardo e inutile ius soli liguriae, pe pöi ammiâse ben da-o dî ninte depoì à l’immotivou e repentin veto leghista. Do resto, avvardâ o consenso de l’elettorou razzista de l’alleou o l’à a mascima preminensa à peto da sostansa di diritti di minoî foresti nasciui into seu italian, do quæ l’é ben che segge atri à occupâsene. Basta dî de condannâ o razzismo, e pöco conta se into mæximo tempo o teu ciù grande alleou o n’é o ciù lumminoso rappresentante. Nisciun o cuggià l’incoerensa, nisciun o veddià o façile sillogismo, inte sta dansa collettiva de ipocrixia. Do resto peu ëse solo questo o resultato de unna politica che a no l’assumme mai a responsabilitæ de de çernie pe-o benstâ collettivo, ch’a no propoñe mai a-i çittadin di modelli da seguî, ma che a-o conträio i modelli a se î fa dettâ da quest’urtimi, raccuggendo o sentî de fòlle e contentandone o maggiô numero pe preservâne o consenso.
No stupisce donca che chi o divulga o verbo do Prescidente da Region o l’agge liquidou tutto questo comme un “un assurdo dibattito su un neonato”. De assurdo, pe taxei o resto, gh’é solo o fæto che à l’arba do 2021 a primma nasciua de l’anno a no l’agge tutti i mæximi driti di atri.