Da-o giornale a-a politica
O Giuseppe Sciortino, passou da Primocanale à l’offiçio stampa do gruppo da Lega in parlamento, o l’é solo l’urtimo di giornalisti liguri ch’an stramuou da-i ranghi de l’informaçion à quelli da politica, ascì con mantegnî de vòtte, comme inte sto caxo, un ròllo ligou a-a communicaçion. Unn’inverscion de prospettiva ch’a no deve mäveggiâ, anche perché o no l’é l’unico movimento inte l’äia: da chì à quarche meise unn’atra pediña a lascià dòppo tanti anni o mondo da televixon pe intrâ into staff – za ben ben fornio – da zonta da Region. Ma l’é ancon fito pe intrâ into menuo.
À incarnâ quello ch’o pâ un costumme antigo, ma sempre ciù in veuga, l’é stæto de fresco o Ferruccio Sansa, giornalista de il Fatto Quotidiano candidou a-a prescidensa da Liguria pe-a coaliçion giano-rossa battua a-e urtime eleçioin. Unna decixon, piggiâ dòppo un muggio de remesci e zinzanie, ch’a no poeiva no açende de rouxie interne visto che pe di anni lê o l’aiva attaccou a mæxima parte che dapeu a s’é trovâ costreita à sostegnîlo. Do resto anche o seu avversäio, o Giovanni Toti apeña confermou, o l’é un collega, desbarcou in politica graçie a-o seu editô (quande anavan ancon d’accòrdio). Son tutte preuve che in Italia l’informaçion e a politica no son doî mondi alternativi, comme dovieiva ëse into modello anglo-american do giornalista watchdog, ma ciufito communicanti.
Se dixe de spesso “giornalisti impremmuæ a-a politica”. Ma de migraçioin pæge l’é diffiçile che no seggian definitive. Tornâ à scrivine dòppo aveighe misso drento i pê, da dipendente ò fiña da militante, o ponieiva di gròsci problemi de credibilitæ. Se o Sansa, passou i çinque anni da conseggê de minoransa, o repiggesse à fâ o seu mestê, con che moro o porrieiva criticâ quelli che gh’an asseguou unna paga d’öo? E ancon pezo, quæ imparçialitæ o porrià avvantâ quande o dovià fâ a-a reversa? L’é pe quello che o seu amigo Marco Preve, firma de La Repubblica ch’o l’aiva açettou d’intrâ inta lista, unna vòtta fallio o “sato” o l’é tornou a-o giornale, ma sensa poeise ciù occupâ de quelli argomenti.
L’é importante aloa capî e raxoin de unn’emorragia ch’a pâ infinia. Se porrieiva cazze inta retòrica di giornalisti “vendui” che van donde î pagan megio sensa dâ a mente à rompî o rappòrto de confiansa co-o pubrico. Pe çertidun a saià coscì. Ma a veitæ amaa a l’é che o giornalismo “duo e puo” o no l’allecca (ciù) comme i atri loei da communicaçion. Apreuvo a-a crixi de l’editoria, comensâ di primmi anni 2000 e mai finia, i ciù tanti pòsti de travaggio se son mesciæ da-e testæ a-e struttue de aziende, di partii e di enti pubrichi, che de sovente garantiscian un contræto veo, unna paga boña e de condiçioin ciù umañe, à differensa di editoî. E besorrieiva domandâse ascì se i giornalisti a-e dipendense de giornali e televixoin seggian davei liberi de contâ a veitæ, ch’o l’é l’unico senso de sto mestê.
O problema o gh’é. Perché quande un giornalista o va da l’atra parte da barricadda o cangia pròpio de travaggio: o l’à da fâ solo l’interesse de l’organizzaçion ch’a l’à ingaggiou, sensa dovei ciù risponde a-i lettoî. E anche inti offiçi stampa de instituçioin o confin tra communicaçion pubrica e propaganda o l’é tròppo sottî pe no ëse passou. Coscì l’informaçion a perde e seu megio fòrse, e manco ciù i zoeni, che pe do bello son stæti carne fresca da spremme pe pöchi franchi, van apreuvo a-o seunno de vegnî giornalisti. A “gavetta” ancheu a no se fa in sciô marciapê, ma co-e dirette Facebook inte stançie do poei.