A coa de eleçioin americañe e l’assato a-o Campidòlio

Gh’ea unna vòtta l’America. Quande un zoveno franseise, Alexis de Toqueville, o poeiva anâ inti Stati Unii e pöi scrive La democrazia in America (1835-1840), profetizzando a democraçia, sto scistema diffamou da-i filòsofi, comme destin de l’Occidente. Profeçia ch’a s’é avverâ, dapeu, anche pe un muggio de atre cöse: a societæ de massa, o pluralismo, o federalismo, o judicial review, i movimenti pe-i diritti civili, sciña internet. A-o ponto che, ancon ancheu, chesesegge cösa avvëgne inti Stati Unii a piggia un valô profetico: preveddemmo automaticamente che capitià anche da niatri, primma ò pöi, in Euröpa e into mondo.

Cöse dî, da sto ponto de vista, de l’assato do Campidòlio da parte di neuvi barbari de Trump? Che segno o l’é pe-o futuo da democraçia in Occidente: e urtime convulscioin do populismo ò l’iniçio de unna regrescion infinia? In assensa de un Tocqueville, ô capiemo solo dòppo. Pe exempio, ô capiemo da-a fin che faià the Donald, se o sghindià tutti i procesci che o seu golpe preterintençionâ o miava solo à prevegnî: perché o no l’avià miga pensou de poei abailâ o resultato elettorale? Sempre Tocqueville o nottava za che no gh’é grande costion, inti USA, che a no finisce davanti à un giudiçe.

I rischi pe-a democraçia statunitense son instituçionæ – a Constituçion federale a domanda ben ciù de un taliando, doî secoli e mezo apreuvo – ma sorviatutto politichi, ançi adreittua colturali. Comme à dito inte unn’intervista Alec Ross, za consulente do Partio Democratico statunitense che ancheu o l’insegna à Torin, unna parte importante di americhen a vive ormai inte un atro universo. Atro che o tradiçionale isoaçionismo statunitense, i nazisti de l’Illinois. No schersa manco o sciuscianta pe çento di franseixi ch’o refua i vaccin, dòppo i scandali da sanitæ drammatizzæ da-i soçial. Tanti an osservou che e imagine de l’assato a-o Campidòlio che bottezzan inte tutto o mondo paivan e scene de un cine. Pezo ancon, l’é comme se i marçien de l’avvoxou scherso radiofònico de Orson Welles, into 1938, stavòtta fïsan desbarcæ pe in davei, e dòppo avei fæto o seu spettacolin into tempio da democraçia se fïsan mescciæ con niatri umen, rendendose indistinguibili. O problema, in effetti, o no tocca solo o nòstro fræ maggiô nordamerican, che niatri da l’atra parte de l’Atlantico, tendemmo à miâ comme se fïse definitivamente rimmincionio.

O gh’à à vedde con niatri ascì, co-a Merkel ch’a bacchetta Twitter perché, dòppo avei creou o fenòmeno Trump, oua o særa un account ch’a deuvia da-o 2009, quande o l’ea ancon solo o conduttô de The Apprentice. O gh’à à vedde con niatri italien, allembeii da-e ondæ do Covid-19 e ormai mai tanto abituæ a-i bizantinismi da democraçia parlamentare da no reagî manco depoì unna crixi de governo surreale. O gh’à à vedde anche con niatri liguri, reduti à pretende che i nòstri vegi seggian vaccinæ inte RSA ò à fâ e pruxe a-e diciaraçioin do nòstro Governatô: che dapeu o saieiva solo o Prescidente da Region, se o no fesse l’american lê ascì. O gh’à à vedde fiña con niatri de O Stafî, che pensando a-o federalismo american magara se domandemmo se o nòstro federalismo sanitäio – i 20 scistemi sanitäi italien che de de ræo preluxan, e ciù de spesso fan di desastri – no ne l’aggian lasciou pròpio perché o l’é ancon pezo, se poscibile, do federalismo elettorale.