Next generation EU pe sarvâ a democraçia

Son apreuvo à leze, con colpevole retardio, “M” de Mario Scurati. O libbro o no l’è fòscia un cappolavoro da lettiatua, ma o l’è interessante sotta tanti aspeti, no urtimo quello de obligâ à ritornâ co-o pensceo à un momento da stöia d’Italia che pe çerti franzenti o reciamma quello che vivemmo. Mai comme inte sti urtimi anni se son manifestæ con evidensa coscì tanti scintomi soçiali, econòmichi, colturali e politichi, che un secolo fa an portou a-a cheita da democraçia liberale. Gh’è unna classe medio-bassa impoveria e arraggiâ, in boña parte cheita inta paludde da povertæ, e che a vegnià squæxi de seguo punia ancon da-a crixi ch’a l’è lilì pe arrivâ; gh’è unna classe dirigente “democratica” lontaniscima da-o sentimento popolare, ch’a vëgne percepia comme tale, e in quarche mòddo comme abuxiva. Gh’è un milieu colturale, emerso dòppo a fin de l’egemonia da scinistra, intravegnua assemme à l’affermaçion di social network, donde i valoî prevalenti reciamman a fòrsa fixica, co-o neuvo culto do còrpo, e desprexan a coltua comme a s’è inteisa fin à un vint’anni fa, tanto che ancheu se conosce de ciù i chef ciù ò meno televixivi che i intellettuali ò i scrïtoî, se ghe n’è ancon. O l’è un contesto donde no se vedde ciù con sospetto l’ammermâse de libertæ democratiche, incangio de un recupero da “puressa colturale” da societæ e da “proteçion” da-i problemi caxonæ de un mondo complicou, ch’o no se veu capî. Succede coscì in India, in Turchia, in Ruscia, in Ungheria, in Polònia, fin à vëi in America; Succede in boña parte da societæ italiaña. Unna parte ch’a l’è maggioransa. Governi deboli, quelli democratichi, missi à confronto con l’efficensa, ciù ò meno reale, de quelli autoritäi ò illiberali, che zeugan façile perché mettan à taxei e voxe critiche. E pöi gh’è a Ciña, neuvo grande attô politico, ch’a l’è quello ch’a l’è, e se anche un o l’aveiva in antipatia i USA, o peu fâ ben i confronti e capî che anemmo pezo de primma. A democraçia a se screuve torna debole, e pericolosiscimo o l’è o momento into quæ, comme oua in Italia, ma anche in Fransa, o governo in carrega o fa stâ – relativamente – tranquilli i progrescisti, i liberali, i democratichi, ma à costo de taggiâ i ponti emoçionali, de immedeximaçion e rappresentaçion, con unna grandiscima parte da societæ. ch’a se sente squæxi unn’atra naçion. Son queste e cöse che vëgnan in cheu lezzendo o libbro do Scurati, e l’unica constataçion poxitiva a l’è che pe fortuña ni Salvini ni a Meloni se peuan paragonâ à Mussolini, pe intelligensa politica e capaçitæ strategica. Se porrriæ anche azzonze che no gh’è i squadristi che meñan, ma l’è veo solo in parte: da un lato a nòstra societæ a tòllera meno à violensa fixica – ma a treuva atre forme, se pense l’hate speech di social –, donca l’è imposcibile imaginâ o reproduîse de unna realtæ comme quella de çent’anni fa, quande i parlamentari anavan in gio co-a pistòlla. Da l’atro, di epixòddi comme quelli de Capitol Hill (di quæ parla o mauro Barberis à pag. 2), ò tanti ciù piccin che arrivan da tutto o territöio italian, dan a mesua che di tempi scui peuan ancon vegnî, se persciste a sensaçion che o potere o segge illegittimamente tenguo lontan da-i partii sovranisti, anche quande rappresentan a maggioransa. Inte sto senso, l’idea de Renzi de sostituî un governo debole e lento con un executivo guiddou da Cottarelli, ò scimili, a l’aiva un senso, sciben ch’a no l’ea esente da rischi. Ormai l’è diventou squæxi un cliché quello de dovei vedde de segonde intençioin inte acrobaçie politiche de senatô de Rignan, ma se se fermemmo à l’idea do “cangio de passo”, l’è evidente che o spende ben i fondi che vëgnan da l’UE (di quæ parla, tra l’atro, Camilla Ponzano à pag. 3) a l’è l’unica poscibilitæ de no trovâse do 2023 co-i sovranisti a-o potere. E de fâ cazze l’Italia inta çercia di paixi illiberali; l’aperitivo do 2018-2019 o l’è bastou.

Se donca a condiçion perché o Next Generation EU italian o segge un successo a l’è quella de sacrificâ Conte e o populismo à çinque stelle, sacrificâ a smania de governo do PD – e de quello che resta da scinistra – e inandiâ unna coaliçion de fòrse antisovraniste (comme se diva, “da-i liberali a-i communisti”) ligâ no solo da unna negativa, benscì fòrte de unn’idea de sviluppo, de unna gestion efficente, eben mi creddo che beseugne piggiâne atto e mette da parte o resto. Capî ch’a l’è unna lòtta contra o tempo, e se no se fa ninte, se se va avanti coscì, tra un pâ de anni e drite montan e chissà pe quante gh’arrestan. Inte tutto questo a Liguria a l’aviæ a neçescitæ, ciù che mai, de capî cöse a veu – e ciù che atro, cöse a peu – fâ inte sto secolo. L’è un pâ de anni che i fondatoî de sto giornale aivan misso in gio l’idea de domandâ à l’OCSE unna Territorial Review dedicâ a-o nòstro territöio; unn’operaçion che a piggia un anno de studdi e trexentomia euro de fondi. L’idea a l’è ancon valida, e se a no diventa ostaggio de unna parte politica, a peu rappresentâ un momento de rifondaçion collettiva. Arrivià tanti fondi; fòscia no l’è tròppo tardi pe capî cöse fâne.