Piggia l’arte e (no) mettila da parte

“Noi abbiamo un occhio di attenzione per i nostri artisti che ci fanno tanto divertire e ci fanno tanto appassionare”. Paggiassi, animatoî, maccette: pe-o nòstro premier Conte sto chì o l’é o ròllo de miggiæa de operatoî do mondo da coltua. A coltua a l’é un grande “circo do ninte”, o no l’é un beseugno primmäio, a no l’é unna ricchessa materiale e soçiale, a l’é unna speisa, e inti momenti de crixi e speise se devan redue. L’é neçessäio rilanciâ con grendi investimenti solo quelli settoî che generan unna ricchessa ch’a se peu toccâ.

Escì ben che co-a coltua se ghe mangia. Da-o rappòrto “Io sono coltura” 2017 da Fondaçion Symbola e Unioncamere, o settô e o seu induto mescian o 6,1% da ricchessa totale produta in Italia. Sto chì o l’é o peiso econòmico da Bellessa, ch’a no se limita a-o patrimònio artistico, ma a comprende ascì e industrie creative, da l’architettua a-o design, e quelle ciù clascicamente colturali: cine, editoria, muxica, stampa, videozeughi e software. Con boña paxe da politica italiaña che in vint’anni a l’à desinvestio un miliardo de euro. Un comparto che, tra l’atro, o dà impiego à un milion e mezo de persoñe, de quæ uña in sce quattro sotta a-i trentaçinque anni. A meitæ a l’é sotta i quarantaquattro.

L’ammetto: st’urtima nòtta a no fâ vibrâ i pôsci a-i liguri, che i zoeni î an saluæ da do bello e, a-o netto di proclammi pe fâ in mòddo che tornan, preferiscian pensâ à unna Silver Economy pe-o futuo. Megio che sti “artistòidi” comensan à fâ di mestê seri; l’é da anni do resto che e moæ e i poæ dixan a-i figgi che de coltua no se mangia, e che l’é megio che vaggan à travaggiâ. Se dapeu sti zoeni an coæ de dedicâse a-o mondo da coltua, che staggan belli seren che ghe saià delongo quarche cultural manager, da l’erto do seu diplòmma, à dâ spaçio no retribuio à di zoeni plurilaureæ, poliglòtti e “masterizzæ” inte discipliñe do settô, che inte di atri paixi europëi, con de cifre econòmiche do settô ciù basse ben, î faieivan di stimmæ e pagæ profescionisti. Donca i zoeni che fassan i “mestê seri”; gh’é solo un piccin problema: comme â mettemmo co-o Next Generation EU? In Italia ô continuemmo à ciammâ Recovery Fund, fæto ch’o me fa pensâ che no emmo manco a minima idea de cöse ne domandan. Cöse rispondemmo a-a von der Leyen quande a dixe che “beseugna fâ in mòddo che o Green Deal europeo o rappresente anche e sorviatutto un neuvo progetto colturale pe l’Euröpa”, azzonzendo che pe fâlo a UE a pensa de “inandiâ un neuvo movimento Bauhaus europeo, unna piattaforma conlaborativa do design e da creativitæ, inta quæ architetti, artisti, studenti, sciensiæ, inzegnê, designer e chisesegge o dexidere contribuî o pòsse realizzâ sta vixon”? A ô ciamma o “neuvo Bauhaus europeo” e a ô descrive comme quella “fòrsa trainante pe connotâ o Green Deal europeo in mainea innovativa e antropoçentrica, rendendolo ciù accaparrante. o saià un movimento basou in sciâ sostegnibilitæ, l’incluxivitæ e l’estetica”.

Ò l’imprescion che no bastià camminâ à arvî torna i Uffiçi, ma saià neçessäio cangiâ de prospettiva.

Son d’accòrdio con Martina Bagnoli, direttoa de Gallerie Estensi, quande a dixe che se l’Italia a fïse un paise à l’avanguardia inta produçion de coltua, un zoeno studioso de Dante o no l’anieiva à l’estranxeo à insegnâ ò, azzonzo mi, o no finieiva à impîse o frigo con un travaggio in Esselunga perchè reduto à volontäio colturale pe-i eventi do seu commune. Se o fïse à l’avanguardia o l’investieiva ciù che in sciâ domanda colturale, saiva à dî in scê aziende che promeuvan e mostre, apreuvo à un modello consummistico de massa ormai datou, in scî riçercatoî e i artisti che produan di contengui, saiva à dî in sce l’offerta. Penso aloa che fòscia, se aviemo o coraggio de investî in scê persoñe e in scê idee, magara quarche palanchetta da l’Euröpa o n’arrivià. Tutto sta into vedde se quello patrimònio uman o no se saià definitivamente perso tra unna sganzia e l’atra de un supermercou.