“Giova”

Un fæto che o no se peu contestâ o l’é che a pandemia a l’à portou à cavarcâ e onde do web, comme a panacea de unna recluxon inevitabile. Poei çercâ coscì di pòsti esòtichi, di mangiæ d’otramar, de notiçie da-o sô levante, ò de bufale. Fruiçion rapida e conoscensa inmediâ. Vorriæ analizzâ quello che l’é successo à livello globale e à livello locale. Cöse o l’aviæ posciuo çercâ, aloa, un zeneise, e donde o l’aviæ posciuo imbattise tra l’infinitæ de informaçioin disponibili? Partindo da zero, cian cianin, preuvo à riconstruî – faxendone un collage – comme un mæ superbiscimo conçittadin o l’aviæ agio inti lenti dòppodisnæ de l’ormai saluou annus horribilis. “Ammia un pö, Bruna”, dixe o Stefano dito Battistin, “into pesto oua i zoeni ghe mettan o bitiro!”. “Ma comme l’é poscibile? Fanni vedde”. E l’é coscì che, ciù ni meno, porrieiva comensâ da un divan chesesegge de San Fruttuoso o tagadà de riçerche invexendæ in sce Google, pe mezo de quelli telefonin tecnològichi, diti smartphone. Digitando donca de paròlle magiche comme “pesto, Genova, Liguria”, i criceti di motoî de riçerca, corrindo spedii inta reua do web, appartoriscian diversci resultati tra informaçioin, fotografie e poscibilitæ de accatto. O fattô coioso o l’é che tra e diverse imagine pòsse spægâ anche a fotografia do nòstro eximio Governatô, o Prescidente Giovanni Toti dito Giova, che con un fattoriso sornion e doe manoñe da hulk o tëgne in man unna xatta de trenette a-o pesto, con orgheuggio popolare da “Sagra della Patata” de Roëgno.

Sto chì o no peu che addesciâ ancon ciù coioxitæ verso o sòlido Governatô, che inta collettivitæ o guägna delongo de ciù consensci a-i pê de eleçioin, tra unna lasagna e unna maggetta arancion. Comme peu donca quello pilastro, quello baluardo de integritæ e serietæ, avei anche o moro scimpatico da bonellan? Quello che l’é seguo l’é che çerti liguri pòssan avei quella sensaçion de familiaritæ ch’a fa pensâ “Bellin òh, mi unna çeña con lê m’â faiæ, de seguo no se meue de famme!”. E da st’asbrio se finisce, pe fòrsa, sponciæ da quella coioxitæ pròpia di ëse umen, à fâ un gio in sciâ pagina FB do Giova, mai bello tripudio de notiçie de ògni genere.

Saluando Bruna e Battistin co-o pesto, xoemmo in sce Elena e Riccardo à Camoggi che, çercando in sciô social network de föto de tramonti spettacolari in Liguria (sponciæ da quello spirito de competiçion tipico do ligure, pe-o quæ l’é sempre tutto megio in casa pròpia), intoppan in sce de imagine romantiche unie à di messaggi de speransa, che vëgnan delongo da-a pagina de Giova. Un Giova che m’é cao imaginâ, vestio da marinaretto tanto che o canterella “mare, profumo di mare”. Ò un Giova, che sò, inte quelli locali movida in riva a-o mâ à gustâse un bello mojito insemme a-i amixi de unna vitta, quelli da ligamme apostòlico comme Matteo e Marco. Pe no parlâ pöi de Miguel e Anna da Pegi che, sfinii da l’imbruttimento casængo, deciddan de piggiâse cua de liatri inandiando in casa unna palestra, de mòddo da evitâ l’ira funesta asbriâ in sce quelli babillen di runner. Inta riçerca de materiale pe destannâ di trucchi pe superâ e seu performance, t’ô lì chi te sata feua: o nòstro Giova, tutto suou, moælo, tutto rosso e sfinio dòppo a corsa in sciô tapis-roulant! Seguo che a poliedriçitæ de interesci in scâ quæ spaçia o nòstro Governatô a no l’é miga röba da ninte, atro che micce! Pe no dî pöi da Tina da Fontanegi, quande profondamente sciätâ da-a rottua de l’impromisso co-o seu bello galante Luca, sentindose strassonâ, insultâ e feria dòppo o discorso concluxivo da stöia d’amô into tempo de un lockdown malandrin, a se documenta in sciô scignificato profondo da paròlla “indispensabile”. In sce sto ponto no me pâ o caxo de sponciâme ciù in là. To make a long story short comme dixe i nòstri coxi da tæra d’Albion, à concluxon do piccin elenco no se peu che riconosce a-a pagina FB do nòstro Governatô o primmo premmio da pro loco, fonte sensa fin de informaçioin che spaçian da l’enogastronòmico, a-o statistico, a-o medico, a-o soçiale, a-o turistico: fotografia, testi e contengui da megioâ. Gh’é da travaggiâ. Voto: 6-.