Dònne de diritto sensa guæi diritti
L’é quarche tempo che gh’é un debà appascionou ch’o l’à comme çentro e vocale; into specifico “a” e “o” son oggetto de unna discuscion ch’a no se riesce à sghindâ, relativa a-a seu applicaçion a-i diversci ambiti lavorativi. Architetto ò architetta, avvocato ò avvocata, notäio ò notäia. A conteisa a piggia di toin particolarmente feroxi into mondo giuridico, fresco da nòmina à Presidente dei Notai Italiani de Valentina Rubertelli, primma dònna à crovî st’incarrego prestigioso. Do 2019 s’ea averto unna primma fessua inta cortiña mascoliña di illustri ròlli giuridichi co-a nòmina de Marta Cartabia à Presidente della Corte Costituzionale. Ciù che legittimo, donca, pensâ che a paritæ de genere, into mondo giuridico, a segge unna conquista ormai consolidâ. Con bäsigâ inti tribunali s’à mòddo de apprexâ unna grande quantitæ de magistræ dònne; sto riscontro o pâ rasseguante in ponto poscibilitæ che o mondo giuridico o l’òffre a-o gentil sesso. Ma a l’é coscì in davei? Comme sta e cöse into mondo di pescichen, i famigeræ e bistrattæ avvocati? Gh’é un muggio de dònne avvocato; s’incontran tra i chinòlle e i cortî di tribunali, eleganti ò casual, à l’apparensa impegnatiscime, agguerrie, aggrescive. L’é interessante çercâ de capî de cöse se òccupan. In primis, a divixon, quella sacra, tra civiliste e penaliste. E primme, de spesso nervose, verbose, squæxi delongo dotæ de unna piccatua irritante bon à sfiancâ l’avversäio. E segonde co-o sguardo ciù duo, un pittin desincantou e fòscia ciù consapevoli do diväio ch’o l’existe tra lô e i seu colleghi òmmi. Scì, perché sto diväio o gh’é, e o l’é stramesuou.
O se vedde da-a tipologia di procedimenti trattæ, da-a grandixe di studdi di quæ i avvocati son à cappo, e, no urtimo, da-e diciaraçioin di redditi. A-e dònne s’affida de problematiche tendençialmente “uteriñe”; ecco donca a sfilâ e e collaboraçioin co-i çentri antiviolensa, donde de dònne mätrattæ e di minoî abusæ treuvan inte l’avvocatessa unn’amiga, unna moæ, unna frasca, in ciù de, se capisce, unna profescionista. Ò donca into diritto de famiggia, oh, comme san rattellâse ben e dònne in ambito matrimoniâ! Ma cöse dî di procedimenti “importanti”. Quelli pe-i gròsci reati finançiäi, i desastri ambientali, e procedue pe-a constituçion e a gestion de trust, franchising, e collaboraçioin internaçionæ. Ecco, lì l’é ciù diffiçile trovâle, e avvocate. Perché, a-o manco à Zena, no an di grendi studdi, e donca no dispoñan de guæi collaboratoî; perché son moæ, moggê... Ma gh’é unna raxon ciù miödiña, incistâ into scuo de mente di consocciæ che, quande an un problema gròsso, ò di grendi interesci da tutelâ, in veitæ, preferiscian affidâse à un òmmo. E e primme à avei sta mentalitæ son, ahimè, pròpio e dònne; inneggian à unna paritæ che, in realtæ, no comprendan, no sentan, perché, quande an poia, l’òmmo o l’é o sarvatô, a soluçion atavica. Ve ô chì o mondo giuridico, scompartio tra o settô concorsuale, into quæ se premmia a meritocraçia e no o genere, e o settô de l’avvocatua, into quæ, sciben che ti superi brillantemente l’esamme de abilitaçion, ti devi fâ i conti con l’ëse dònna. “T’ê dònna? Damme a mente, intra inte un grande studdio, ti porriæ sostituî i colleghi òmmi inti procesci importanti; sedonca, vira in scê materie conformi a-o teu lato femineo e no stâ à fâ do sciato. Se pròpio ti senti a neçescitæ de combatte, sbraggia bello fòrte che ti pretendi de ëse ciammâ avvocata e no avvocato”.