Gh’è un atro entrotæra

Tutto o l’é comensou inte l’ormai lontan 2003, quande o Franco e mi emmo averto o primmo Bed&Breakfast do commun de Borzonasca (o B&B Shanti House), inte un borgo piccinetto inta zöna de Sorviacroxe, Parco de l’Aveto. Da alantô a Shanti House a l’é cresciua veloce, e a l’é diventâ quarcösa de ciù de un semplice B&B: a s’é transformâ inte un ponto d’incontro, de scangio e de riferimento. Quello che voeivimo o l’ea restâ à vive chì in çimma, sensa renonçiâ à stimoli e soçialitæ, arvindo a nòstra casa into segno de l’accoliensa e da condivixon, e coscì, in mòddo naturale e spontaneo, casa nòstra a l’é diventâ metròpoli inte l’anima, compòsta da tante parte che vëgnan da tutto o mondo. Emmo comensou fito à ospitâ anche foenti a-o pari, con tante stöie, e provenienti da tanti paixi despægi, da l’Alaska à l’Australia. E l’é pròpio coscì che, pe exempio, oua l’é ciù ni meno sei anni che l’é arrivou o Philip, ingleise con unna vitta passâ in Sveçia, pe dâne unna man in cangio de giascio e allögio, deçiddendo dapeu de restâ à vive chì. Ancon primma, do 2009, s’ea unio à niatri o Pippo, diventou o “cheugo-artista” da Shanti, che, comme dixe lê, o “modella e persoñe da drento”, dandoghe da mangiâ de cöse semplici e sañe, fæte pe-a ciù parte co-e verdue do nòstro òrto. A “tavolata” a l’é un di scimboli da Shanti House: chì se mangia tutti insemme, scompartindo quello che ognun o veu ò o peu portâ. Pe sòlito coxiña o Pippo, ma ô peu fâ chionque o n’agge coæ. L’atro segno distintivo da Shanti o l’é sempre stæto a muxica: Gabriele U Elettronicu (o figgio do Franco) o l’à portou à sunnâ e à registrâ tante band liguri e no solo, dando vitta à di conçerti, à unn’aradio, a Shanti family Radio Show, e à tante atre iniçiative comme o Niatri, ch’o l’é un festival de muxica d’esprescion zeneise, che a-o momento o l’é sospeiso pe caxon da pandemia. L’arte a l’é stæta delongo presente, inte de atre forme ascì: i quaddri do Pippo, ch’o dipinze di coloratiscimi paisaggi interiori con pennarelli, penne ò con quello ch’o treuva, e pöi o cine... Scì, o cine, segge comme set pe-e ripreise de diversci cortometraggi – fiña de unna pellicola con di attoî americhen – segge e sorviatutto comme pòsto donde l’é nasciuo Storie di Fungi. Scrito, produto e interpretou da-o Franco (che o l’é anche un di megio fonzoei da zöna), se tratta de unna serie de cortometraggi autoirònichi e un pittin surreali, ma no tròppo, in sciâ freve do fonzo ch’a fa letteramente immattî e persoñe inta stagion da recuggeita, con de belliscime ripreise de l’amigo Federico Telari, videomaker profescionista (se peu vedde tutti i capitoli in sce Youtube). Quello ch’o rende unica l’atmosfera da Shanti, però, o l’é che se capisce chiaramente che pe niatri o no l’é un travaggio... e in effetti o no l’é in davei. Emmo tutti doî un atro travaggio (mi louo pe-o Consorzio di Ospitalità Diffusa “una montagna di Accoglienza nel Parco”, pe restâ in argomento), coscì che into B&B poemmo accheugge i òspiti comme amixi, offrîghe da mangiâ e da beive, passâ a seiaña insemme e praticâ un “prexo politico”, ch’o rende a vacansa accescibile à tutti. Se dovescimo vive solo de questo no creddo che porrieiva ëse a mæxima cösa. Se capisce, beseugna ësighe portæ à vive coscì, scompartindo a casa e o tempo con atre persoñe. De vòtte no l’é façile renonçiâ a-i teu spaçi, ma in sciâ fin a-a Shanti tutto o procede e tutto o s’incastra magicamente. Seguo che a contâ ste cöse oua, vëgne un pittin de nostargia. Oua che co-a pandemia inte sta casa de pria e legno, sempre coscì piña de calô uman, semmo arrestæ solo niatri çinque: mi, o Franco, o Pippo, o Philip e nòstro can Bo.

Ma tornià l’estæ, tornià o sô!