Perché anche i òmmi devan ëse feministi

Sto chì o l’è o deximo numero do Stafî, se se conta anche o numero zero, e se pòsso dîlo, penso che o segge un di megio, fòscia o megio ch’o segge mai sciortio, pe-i stimoli ch’o fornisce, pe-a freschessa de voxe che se ghe treuva, pe-i sponti de riflescion ch’o regalla. Pe l’irriverensa ch’o manifesta.

Mi no aviæ dovuo scrive, perché sciortindo l’8 de marso aivimo pensou de fâ scrive solo dònne. Ma subito dòppo emmo capio che ghe poeiva stâ anche a voxe de un òmmo, à patto ch’a fïse da-a parte de dònne. A nòstra rivista a l’à fæto unna çernia de campo da l’iniçio, òssæ quella de ëse avertamente feminista, de no renonçiâ mai à rimarcâ l’exigensa de mesciâ e ægue de un debà stracco, assente, in sce un di temi primmäi de sto secolo minô. E questo peu fâlo e dònne, in primis, ma peu e deve fâlo i òmmi ascì, perché o cangio soçiale che o rappresentià o razzonze unna paritæ reale, concreta, assoluta, definitiva tra e persoñe de ògni sesso (e de tutti i orientamenti sessuali) o l’è un quarcösa ch’o l’interessa a societæ areo. Lasciâ che segge sempre e dònne à mesciâse, à denonçiâ, à arsâ a voxe, l’è comme refuâ o dovei de çittadinansa, e sensa çittadinansa no gh’è progresso soçiale e colturale e sensa questi, inte democraçie, no gh’è manco o progresso econòmico.

Intremmo into specifico: à Zena decidde praticamente tutto sempre di òmmi de sciuscianta ò settant’anni. Prescidente da Camia de Commercio, do Pòrto, de l’Ariopòrto, Scindico, e avanti coscì, se fadiga à trovâ quarchidun ch’o no risponde a-i requixiti. Imaginemmose l’incontro tipo in sciô “futuo de Zena”, comme quelli che se fava primma da pandemia: inta mäveggiosa cornixe de Palaçio da Meridiaña, o padron de casa Davide Viziano (1949) o prononçia quarche paròlla de benvegnuo; mòdera Franco Manzitti(1947),intervëgne o Scindico Marco Bucci (1959), l’economista Lorenzo Caselli (1939), o prescidente Oddone (1942) e o prescidente Attanasio (1952). Cavelli grixi in platea, dexe dònne in sce çento che parteçipan. Nisciun de meno de trentaiçinque anni.

Zena e a Liguria son ormai a-o delà do “declin da-o carattere strutturale” (Borzani), son intræ inte unna fase neuva ch’a vëgne apreuvo à quella: o sottosviluppo. E o sottosviluppo o se manifesta anche coscì. No se tratta chì de “zoenofilia”, ni voemmo semplificâ. Constatemmo un fæto. Inta riunion straordenäia de l’improvvisâ “unitæ de crixi”, pöco tempo apreuvo a-o deruo do Morandi, tra i stucchi indoæ da Camia de Commercio no gh’ea manco unna dònna. A l’è unna föto ch’a se treuva façilmente navegando in sciâ ræ. A dixe tutto.

O Stafî o s’oppoñe a-o sottosviluppo ch’o l’attanaggia Zena e a Liguria, e o çerca de raxonâ comme se foïscimo inte unna normale çittæ d’Euröpa do secolo vintuneximo. Pe questo emmo vosciuo che scrivesse solo de dònne, e pe questo pubrichemmo unn’imagine, chì sotta, che savemmo ch’a l’è polemica. L’à fæta un collettivo de artiste (che no stan à Zena, e manco in Italia) pe denonçiâ quello che l’è diventou a Giornâ Internaçionâ da Dònna: unn’occaxon pe regallâ un rammetto de mimose. Da l’indoman se comensa torna, tutti a-i seu pòsti sensa sghindâ. Se se veu se peu sciortî à çeña co-e amighe. A l’è a “pittansa do giorno”, doman ghe ne saià unn’atra, se n’ascordemmo fito. “L’8 de marso ne mettan unna mimosa into sezze, e pöi via, avanti comme primma”.

St’imagine, primma de pubricâla, l’emmo fæta vedde à un çerto numero de persoñe. Uña de mascime autoritæ do feminismo italian, Lea Melandri, a n’a dito ch’a l’è “orrenda, di un machismo dei più volgari”. Atre voxe “instituçionali” do feminsmo organizzou zeneise e italian l’an giudicâ, con diversci argomenti, negativa. Incangio, a ciù parte de dònne zoene, con diverse senscibilitæ e sfummatue, n’an riconosciuo o valô provocatöio e disturbante, e n’an convinto à pubricâla. Speremmo che nisciun o se scandalizze, e se o se scandalizza che o se fasse domande. E o preuve à rispondise.