Pianificâ a çittæ insemme a-i çittadin

Inte sto climma d’inçertessa, unna ciacciarâ con Isabella Inti, autoa de “Pianificazione aperta, disegnare e attivare processi di rigenerazione territoriale, in Italia”, dottoa de reçerca in Pianificazione territoriale e Politiche Pubbliche a-o IUAV de Veneçia, insegnante de Urban Design e direttoa tecnica do corso post-laurea Riuso Temporaneo al Politecnico di Milano.

Inta continua inçertessa politica, econòmica, soçiale, ambientale e sanitäia, o l’é poscibile ancon pianificâ o futuo di nòstri territöi?

“Vegnieiva da dî de no, perché segge pe-a politica segge pe niatri urbanisti pâ imposcibile tegnî tutto insemme. Existe però di strumenti che permettan ancon de pianificâ, perché travaggian con l’instabilitæ: unna pianificaçion ch’a crea di progetti complesci, donde a complescitæ a se risòlve inte l’analizzâ, o comprende, o mette insemme e l’adattâ delongo e condiçioin a-o fin de avei di megioamenti into contesto territoiale. A rigeneraçion a compòrta no solo unn’açion fixica in sciô spaçio, ma anche o pensâ torna de neuve economie ambientali e soçiali”.

Quæ insegnamento piggemmo da-e correnti che an adottou di critëi de adattabilitæ pe-a pianificaçion?

“Friedman o l’indicava quattro correnti: riformismo soçiale, attivaçion de un processo de imprendimento soçiale, a mobilitaçion soçiale e infin, sponciandose in ambito politico, a revoluçion, con unna pianificaçion radicale ch’a l’à comme fin a transformaçion struttuale do capitalismo industriale atraverso l’autoproduçion da vitta, o ripristino de unna communitæ politica. Inte sto contesto o nòstro ròllo de pianificatoî o l’é quello de streppâ da-o terren politico de zöne sempre ciù grendi de liberaçion, inte quæ pòssan arreixâ di neuvi mòddi de produçion autogestii, e de governo democratico. Quello che o conta o Friedman o no l’é spario, o prinçipio de “imprende faxendo” ò da “rivendicaçion” son presenti ancon ancheu. Utile pe capî quæ pòssan ëse i strumenti pe continuâ à pianificâ a l’é a texi do filòsofo Burckhardt, Offenen Planung (Pianificaçion Averta), donde o parla do coinvolzimento di attoî locali inte diverse töe de parteçipaçion pe capî e critiçitæ che tante vòtte blòccan i procesci decixonali e dapeu pianificatöi. L’attualitæ do discorso do Burckhardt a l’existe inte un scistema democratico, no inte un scistema totalitäio, donde i tecnichi realizzan a sola vixon do despota. O contributo de communitæ locali a l’é unn’atra bordonnâ da pianificaçion averta: repiggiando Turner, l’architetto o l’à de competense, ma primma che o se ne vagghe da un territöio, o deve transmettile a-e communitæ locali, e lê mæximo, into seu progettâ, o deve ammiâ a-e tecnologie locali, ciù façili e razzonzibili economicamente, da adattâ a-o progetto de transformaçion. Turner o no l’asbria a progettaçion inte l’anarchia, renonçiando a-a figua de l’architetto: a seu idea a l’é o scangio de savei tra o tecnico e a popolaçion locale. Se capisce che sto mòddo de procede o piggia do tempo, ma o l’é neçessäio se se veu inandiâ de çernie adeguæ”.

Quæ o l’é o ròllo da politica inta pianificaçion averta?

“A voentæ politica a l’à un gran valô into processo de pianificaçion averta. o tempo circonscrito de un ciclo amministrativo o l’é un tempo de riferimento, ma derê à sto tempo no se deve asconde a voentæ de no coinvòlze seriamente e persoñe”.

Gh’é ancon do sæximo into pianificâ unna vixon à longo termine?

“Rispetto a-i progetti che disegnan torna i spaçi fragili, ma anche de äie desmisse stramesuæ, o tema da vixon o ritorna. Compoñe di messaggi progettuali a-o limite de l’utopia e cacciâ o cheu a-o delà do sappello. Beseugna dapeu adattâla torna a-a realtæ quotidiaña, rende l’utopia “realizzabile” (J. Friedman). O Pòrto Antigo à Zena o l’é un exempio de utopia realizzâ. No solo l’utopia, do resto, ma a pianificaçion strategica ascì a definisce un scenäio à longo termine a-o quæ travaggiâ con de linie guidda e di strumenti pe modellâlo in scê exigense econòmiche, politiche, ambientali e soçiali che cangian into tempo. Un atro strumento da pianificaçion averta o l’é quello do riuso temporaneo, ch’o l’òccupa quello tempo de mezo tra unna vegia destinaçion d’uso e unna neuva. O riuso temporaneo o l’attiva de neuve economie e o mostra, fornindo un imaginäio ch’o se peu toccâ, che çerti spaçi, che pâ no se ne pòsse fâ ninte, se riesce à abitâli torna con de risorse da rie. E riattivaçioin temporanee pòrtan à de neuve consapevolesse civiche, atraverso a sperimentaçion ch’a l’aggiutta à scrovî e vocaçioin di spaçi. Comprende e vocaçioin, de vòtte inatteise, o l’é un tascello pe unna pianificaçion definitiva e sostegnibile. Se capisce che a pianificaçion averta, che à Milan a s’é traduta into PGT2030, a l’à beseugno de tempo. O tempo destinou a-a pianificaçion o no l’é perso, ma guägno: con sto tipo de pianificaçion s’avansa dapeu de incomprenscioin, di conflitti in sciô territöio, de diseconomie e di blòcchi inta rigeneraçion. Do resto, pe pianificâ avertamente no son neçessäie solo e risorse: ghe veu a voentæ politica e a capaçitæ da politica de çerne”.