“8 marso”

Òh finarmente gh’é da festezzâ! Finarmente arrivià de mimose, de reuse e de çeñe romantiche pe sublimâ à dovei niatre Dònne!

Eh scì, perché sta straordenäia escluxiva ch’a ne pertocca a l’arriva, pontuale comme unna cartella de Equitalia, ògni sacrosanto 8 de marso. A l’arriva pe regordâ segge e conquiste soçiali, econòmiche e politiche, segge e discriminaçioin e e violense de quæ e dònne son stæte e son ancon oggetto, in tante parte do mondo. Anche chì da niatri.

Za, e “dolorose conquiste”, quæ pe exempio a paritæ de genere, tanto caa a-i ambienti de travaggio, pe-i quæ i stipendi de dònne resultan ancon ciù basci rispeto à quelli di òmmi. Comme se aveighe l’öxello o garantisse chissà quæ eccelso livello de profescionalitæ e de competense. Ò comme o tasso de occupaçion, e pensemmo che do dexembre 2020 s’é registrou 101.000 occupæ in meno, di quæ 99.000 dònne. Ò o riçeive de prescioin pe-e gravidanse, sentîse inadeguæ comme lavoratoe e de conseguensa emarginæ. Ma no preoccupemmose, no femmo de l’allarmismo, intanto l’8 de marso se anià à çeña da Zeffirino! L’urtima conquista razzonta (e pe atro de dubbio gusto) a sta fòscia into fæto che se no ghe fïse stæto a pandemia inguanno ascì aviëscimo posciuo infiâ dexe franchi inte miande de un cubista, protagonista de quarche spettacolin inti locali, tanto che ballando o n’aviæ arrembou in sciô moro o pacco fasciou inte di perizòmmi leopardæ. Ah, che bell’imagine edificante e che bella a “Festa da Dònna”, se sente za l’äia de primmaveia, no ve pâ? Sta freschessa pua da conquista, ch’a sa de suô e de lagrime. Me ven da immediximâme inti möti de l’anima ch’a porrieiva aviei provou a sufraggetta: negroî, bugne pe-e bòtte piggiæ, e splendô pe-a lòtta inta conquista di diritti!

Se trovemmo do doamiavintun e in sce sti succesci guägnæ da duxentoçinquant’anni à sta parte se semmo assettæ con un pittin de pascivitæ e con ätretanta sosta, arrogansa, arbaxia da parte de chi e regole o ê gestisce. Squæxi sempre un, squæxi mai uña.

Ma no disperemmose, lunesdì a-i 8 de marso bevemmo sciampagna e via: evviva! E dapeu da st’anno chì ne peuan ciammâ “avvocata”, “architetta” ò “inzegnea”! Quello che fòscia o no l’é ancon ciæo à basta o l’é che ne poei ciammâ anche “tognolino” (ògni riferimento à persoñe ò a cöse o l’é casuale areo, ndr.) ma, perdiaña, garantîne un stipendio a-o pao di colleghi “avvocati”, “architetti” ò “inzegnê”, e ciantæla de aprettâne se arrestemmo graie, portandone à autoeliminâse pe fâ vive unna vitta sereña e permettine de progredî into travaggio.

E dapeu, oua che o l’é arrivou Mario Draghi ti veddiæ che se scistema tutto; lê scì che o l’é “sul pezzo”, comme dixan, o l’é òmmo de mondo, o l’à giou in longo e in largo confrontandose con de realtæ foreste comme quelle do Nòrd Euröpa che da dònna an unna conceçion bella diversa da quella italiaña (ò megio, nordafricaña).

Graçie Marione d’avei confermou a predispoxiçion do nòstro ammatiscimo Paise con un neuvo Governo compòsto da 23 ministri, 15 òmmi e 8 dònne.

Insomma, megio che anæ de còrpo, viatri e e mimose, o vaso ghe l’ei lì derê.