Ripensâ completamente o settô turistico ligure, pe recuperâ i tempi longhi

A l’é a Liguria unna tæra “leggiadra”, scriveva o Cardarelli. Me pâ che ancheu a nòstra imagine a segge quella de unna tæra greive e sensa vitta, abbattua da alluvioin, desoccupaçion e desgraçie. Pe combatte e imbösâ st’imagine da Liguria, ch’a ne rende pöco accaparranti a-i euggi do mondo, saieiva l’oa de inandiâ de strategie de valorizzaçion territoiale che boñe à rilanciâ a nòstra region in sciô cian de infrastruttue, de l’ambiente, da coltua e donca do turismo ascì.

Scì, perché sti aspetti son fortemente correlæ e no l’é poscibile pensâ a-o turismo comme à unna bordonnâ do sviluppo ch’a sta pe conto seu. Purtròppo pâ che o nòstro governo locale o no l’agge compreiso cöse segge esattamente a valorizzaçion territoiale. Di eventi estemporani de pöca qualitæ e rivòlti escluxivamente a-a popolaçion locale, a farta de collegamenti efficaci con atri territöi e de struttue riçettive vegie fruste, o crescio de operaçioin ediliçie e commerçiale à fronte de un frazzo demografico che no se riesce à imbösâ, no faian da nòstra tæra quello bello pòsto ch’a merita de ëse.

A Liguria a l’à beseugno de de neuve politiche pe tornâ à ëse a meta elegante e ambia ch’a l’é stæta scin à che no l’é guæi, tiatro de importanti premmi e festival artistichi e letteräi, ponto de incontro pe intellettuali e personalitæ de tutto o mondo. O turismo inta Liguria do primmo Neuveçento o l’à sacciuo coniugâ coltua e demoa, tutela do paisaggio e modernitæ de struttue riçettive. Da-a Rivea di Fiori a-o Gorfo di Poeti a nòstra lengua de tæra streita in sciô mâ a l’emanava un fascino discreto e a formigoava de un turismo compòsto e armonioso. L’ea façile innamoâse di nòstri paisetti coloræ arrampinæ in scî bricchi, di profummi de unna vegetaçion ecclettica, de viste in sciô mâ e da paxe che a conciliava repöso e inspiraçion, da luxe reusa ch’a l’inonda i tramonti. e i nòstri borghi e e çittæ an visciuo de un turismo stançiale e abitudinäio fæto de foresti che se sentivan parte integrante de nòstre communitæ locale.

E l’é à sto modello che emmo da tornâ, ò megio, a l’é sta vixon chì che dovemmo reinterpretâ: quella de un turismo lento e sostegnibile che o vagghe insemme a-i caratteri da nòstra tæra e de nòstre gente. Ô definiæ un turismo pe naveganti e pe seugnatoî.

Un neuvo mòddo de fâ parlâ i nòstri tesöi, à traverso di viægi lenti de scoverta de tante peculiaritæ artexanali e enogastronòmiche, e de riscoverta di ben colturali spantegæ e ascoxi inte un museo diffuso à çê averto. Serve meno marketing e ciù valorizzaçion do territöio: primma dovemmo riconstruî o rappòrto co-o nòstro ecoscistema e rilanciâ a vitta de nòstre communitæ, e solo aloa comensâ à communicâli.

I progetti presentæ da-a Region liguria pe-o Next Generetion EU peccan de miopia: i fondi domandæ an à vedde squæxi solo co-o settô de grendi infrastruttue, trascurando a ræ viäia capillare ch’a collega i nòstri borghi, e açioin de investimento à benefiçio di tanti paixi abandonæ de l’entrotæra, a cua do paisaggio e a tranxiçion ecològica, o settô colturale e soçiale. E ancon se trascua a tranxiçion digitale, quande solo a meitæ da Liguria a l’é coverta da-a banda.

Ma o momento o l’é bon pe provâ à realizzâ un neuvo mòddo de intende o turismo. Saià preçioso no solo i fondi europëi che son apreuvo à arrivâ, ma ascì i neuvi modelli de interaçion soçiale che a pandemia de Covid-19, inta seu tragicitæ, a l’à fæto emerge. O crescio do teletravaggio defæti o l’à agevolou in pöco tempo un cangio inte attivitæ de scagno e de relaçion, ch’o l’à consentio e o consentià à tante persoñe de travaggiâ da remöto. Co-a disponibilitæ de soluçioin abitative temporanee sviluppæ inti urtimi anni, e nòstre çittæ e i nòstri paixi peuan attiâ sto genere de turismo neuvo, meno predatöio e ciù stançiale, bon de integrâse megio co-a communitæ locale. E pe fâ questo ghe veu che se megioa de brutto e infrastruttue che ne collega con atre regioin e Paixi, ma ascì incentivâ economicamente a ristrutturaçion e l’ammodernamento de picciñe struttue alberghee e de B&B che òffran di soggiorni autentichi e esperiençiæ; mette in ræ e realtæ museali e i ben colturali con di ticketing unificæ e de narraçioin digitali; aumentâ l’offerta artistico-colturale à traverso a realizzaçion de unna ræ de rexidense artistiche (ancon assente in mainea struttuâ inta nòstra region) e un ricco circuito de festival e spettacoli de livello naçionâ.

Ma beseugna aumentâ a covertua de internet da nòstra region pe permette à chi ghe vëgne de stâghe do tempo, e de travaggiâ da remöto. L’obiettivo o dev’ëse o superamento do modello de viægio “mòrdi e scappa”, dirizzendose incangio verso l’offerta de esperiense autentiche e sostegnibili che pòrtan i turisti à un rappòrto ciù sòlido e de longo periodo co-a nòstra tæra.