Zena e l’arte, stöia de unna “disfonçion”

A relaçion tra politica e coltua a l’é inta boriaña, a pandemia a l’infuria e a â lògora, da tutte e parte. L’assensa de arte da-o vivo a l’é unn’occaxon pe riflette in sce sta relaçion. Arröbemmo à Montale e paròlle, no pe innarsâ unna litania a-e nòstre “Occasioni” perse, ma pe rivendicâ a nòstra discendensa da unn’ereditæ colturale importante inte un momento into quæ fadighemmo à reconosce unna vixon inte quelli che ne son responsabili à livello locale e regionâ.

Inta difficortæ, no zeneise ma globâ, de protezze a Coltua da-o Mercou, de rexiste à l’“appiattimento unidimensionale sull’inautentico” (ancon Montale), un o gh’arresta à vedde che chì no se riesce manco à difende, pe no dî à sostegnî, e tante picciñe realtæ assoçiative che s’arrabattan comme peuan, ni o travaggio de erto livello fæto pe dexenni da-i mæximi fonçionäi do Commune, do resto seleçionæ tutti, à seu tempo, pe mezo de di concorsci pubrichi specialistichi.

Donca o meise passou un articolo denigratöio, pubricou in sce unn’importante rivista de arte, o l’à mesciou ben ben e anime da coltua çittadiña, descadenando de polemiche, arrivando sciña in Conseggio Communale. Firmou da un advisor do Scindico, l’articolo o demolisce o catalogo de unna mostra in programma à Washington e a-e scuderie do Quirinale à Romma, e manco ancon inaugurâ; catalogo editou da-a Princeton University Press, à cua de doî illustri nommi da stöia de l’arte à Zena. Perché? Autolexonismo? Perché a mortificaçion, da parte de di rappresentanti do commune, de seu mæxime profescionalitæ? O Commun o l’à rispòsto che no gh’é nisciun caxo: unn’ambasciatoa da coltua zeneise, stipendiâ da-o commune comme consulente esterno, a l’à agio à titolo personale, e critiche recazzan inta normale dimenscion do confronto tra “accademichi”. Accademichi? Pe caxon de di personalismi che no se peuan capî, se fa do mâ sciña à quello settô che o paiva incontestabile, o patrimònio artistico do Baròcco zeneise – co-i “seu” stòrichi de l’arte, da carriere intreghe à erta specializzaçion – pròpio in occaxon de unna seu prestigiosa celebraçion oltreoceano. Un atro exempio, tra i tanti che se porrieivan fâ: into 2019, à unna mostra in sce Isadora Duncan e e arte figurative in Italia, a primma do genere into nòstro Paise, da-o titolo mäveggiosamente pop, Danzare la rivoluzione, cuâ da l’alantô direttoa di Musei di Nervi ch’a l’aveiva progettâ pròpio pe-a GAM (Galleria d’Arte Moderna), eben no gh’é stæto concesso de trovâ casa, ni fondi, inta nòstra çittæ. Coscì, tutt’assemme, e dòppo che a politica e l’amministraçion communale de Zena aivan za domandou de inandiâse operativamente in mòddo deciso. Co-o resultato de vegnî ospitâ à Firense, primma, e a-o MART de Rovereto, dapeu. Torna a mæxima domanda: perché? A politica a no s’accòrze de risorse artistiche e umañe ch’a l’à? A no ê conosce, a no ê sa riconosce?

Se peu ëse corretto pensâ che unna diffidensa quæxi biològica a ne rende incapaçi de dâ fiducia a-i “nòstri” talenti, e che o famoso Nemo propheta in patria inte sta çittæ o diventa ciù fatale che altrove, no poemmo no osservâ che sto tipo de disfonçioin – torna Montale “drammi non se ne vedono/se mai disfunzioni” – che son za colpevoli à livello orizzontale, tra pròscimi, son in çerti caxi diventæ unna regola a-i cien erti, con determinâ l’impoverimento de unn’offerta colturale ch’a fadiga à conservâse, figuemmose à rinnovâse.

L’unica disfonçion che s’auguemmo fortunâ, pe-o momento, a ne pâ quella d’avei portou o David Livermore a-a direçion artistica do Teatro Stabile di Genova. Levou sta speransa, à son de disfonçioin e eccellense se fan da parte, quande no vëgnan taggiæ feua sensa giudiçio ò migran altrove, se rinonçia a-i esperimenti portæ avanti da-e realtæ assoçiative minori, validi de spesso, e necessaï, quanto e primme. (I “Ossi di seppa” son conscideræ da-a critica letteräia unn’euvia genialmente provinciale”).